اسلام آباد،11جنوری(اے پی پی): چیئرپرسن بینظیر انکم سپورٹ پروگرام (بی آئی ایس پی) ڈاکٹر محمد امجد ثاقب نے کہا ہے کہ ضرورت مند گھرانوں کی عزت نفس برقرار رکھتے ہوئے ان کی مدد کرنا ہماری اخلاقی ذمہ داری ہے ، بی آئی ایس پی سے تقریباً ایک کروڑ ضرورت مند گھرانوں کو مالی معاونت مہیا کی جارہی ہے۔
ان خیالات کا اظہار ڈاکٹر محمد امجد ثاقب نے بی آئی ایس پی بچت سکیم کے حوالے سے بینکس اور دیگر مالیاتی اداروں کے مابین برین اسٹارمنگ سیشن کی صدار ت کرتے ہوئے کیا۔سیشن کا مقصد صارفین میں بچت کے فروغ کیلئے سیونگ پراڈکٹ کے ڈیزائن پر تبادلہ خیال کرنا تھا ۔
ڈاکٹر امجد ثاقب کا کہنا تھا کہ بی آئی ایس پی بچت سکیم کے تحت ڈیڑھ لاکھ صارفین کو بچت کی ترغیب دینا چاہتا ہے، 1000 روپے ماہانہ بچت پر حکومت 400 روپے اضافی ادا کرے گی۔
ڈاکٹر امجد ثاقب نے اس موقع پر بینک و دیگر مالیاتی اداروں کو بہترین اور آسان سیونگ پراڈکٹ پیش کرنے پر زور دیا اور بچت سکیم میں دلچسپی رکھنے والے بینکوں کو فوکل پرسن نامزد کرنے کی درخواست کی۔
ابتدائی سیشن کے دوران چیئرپرسن بی آئی ایس پی کو بچت سکیم پر تفصیلی بریفنگ بھی دی گئی اور بینک نمائندگان کی جانب سے سیونگ پراڈکٹ کے ڈیزائن پر تجاویز ، بی آئی ایس پی بچت سکیم کوبے حد سراہا۔
سیشن میں ایڈیشنل سیکرٹری بی آئی ایس پی ڈاکٹر محمدطاہر نور، ڈی جی این ایس سی آر نوید اکبر، ڈی جی فنانس وسیم احمد ، ڈی جی او ایم ڈاکٹر عاصم اعجاز ، ڈائریکٹر ملک محمد ابو بکر و دیگر نے بھی شرکت کی ۔
