جدہ ،7 جنوری(اے پی پی ): ولی عہد شہزادہ محمد بن سلمان کے وژن 2030ءکے تحت سعودی عرب میں غیر سعودی سرمایہ کاروں کیلئے کاروبار کے بہت مواقع موجود ہیں اور آئندہ دنوں نہایت منافع بخش سرمایہ کاری سے کاروباری حضرات مستفید ہونگے۔پاکستان میں موجود سرمایہ کار اور سعودی عرب میں موجود کسی بھی ملک کے وہ کاروباری حضرات جنہوں نے یہاں اجازت نامہ لے رکھا ہے ،انہیں اس طرف فوری توجہ کی ضرورت ہے۔ ان خیالات کا اظہار اسکانکم کے سربراہ چوہدری شفقت نے جدہ میں پاکستانی صحافیوں جو پاکستانی میڈیا کیلئے رضاکارانہ کام کرتے ہیں انہیں اپنی جانب سے دیئے جانے والے عشائیہ میں کیا ۔
انہوں نے کہا کہ آپ سب پاکستانی معیشت کے فروغ کیلئے کوشاں ہیں اور پاک سعودی تعلقات کی مزید مضبوطی کیلئے عرصہ دراز سے کام کررہے ہیں آپکی یہ ذمہ داری ہے کہ اپنے ملک کے سرمایہ کاروں کو آگاہ کریں کہ وہ دوست ملک میں محفوظ سرمایہ کاری اور 2030ء وژن کے تحت بڑے بڑے منافع بخش پراجیکٹس میں سرمایہ کاری کریں۔
انہوں نے کہا کہ میں نہایت پرامید ہوں اورخواہش مند ہوں کہ پاکستان میں وزارت تجارت، چیمبرز آف کامرس،پاکستانی سفارتکار اور قونصل خانے اس سلسلے میں سرمایہ کاری میں دلچسپی رکھنے والوںکی رہنمائی کریں گے ۔ سفارت خانے اور قونصل خانے اس حوالے سے معروف سرمایہ کاروں کو سعودی عرب میں جاری اور آنے والے پراجیکٹس کی معلومات فراہم کریں ۔
پاکستانی صحافیوں نے انہیں یقین دلایا کہ پاکستان کی بہتری کیلئے میڈیا سے وابستہ افراد ان سے ہر ممکن تعاون کریںگے۔ اس سلسلے میںتجویز پیش کی گئی کہ سعودی عرب کے مختلف شہروں میں پاکستان سرمایہ کار وںکی فہرست مرتب ہو اور سعودی عرب کے مجوزہ پراجیکٹس کی معلومات انہیں فراہم کی جائیں ۔
اس حوالے سے “بزنس فورم” پرائیویٹ سرمایہ کار، سفارت خانہ اور قونصل خانے کی مدد سے اس فورم کے ذریعے سرمایہ کاری کے معاملات کی رہنمائی کریں۔
چوہدری شفقت نے اس موقع پر اس بات پر خوشی کا اظہار کیا کہ پاکستان اور سعودی عرب سے محبت رکھنے والے تمام صحافی متحدہوکر یہاں موجودہیں اور میری دعوت کو قبول کیا۔
