اسلام آباد،16جنوری(اے پی پی):سربراہ پاک فضائیہ ایئر چیف مارشل ظہیر احمد بابر سدھو سے امریکی سفیر ڈونلڈ بلوم نے ملاقات کی۔ معززین نے دونوں ممالک کی فضائی افواج کے مابین مشترکہ فضائی مشقوں کے ذریعے تعاون اور تربیتی شعبے کو فروغ دینے پر اتفاق کیا۔ انہوں نے پاک فضائیہ اور امریکی فضائیہ کے مابین تربیتی شعبے کے فروغ کے لئے تکنیکی صلاحیتوں اور وفود کے تبادلے کی اہمیت پر بھی زور دیا۔
ملاقات میں پاک فضائیہ کی جانب سے حال ہی میں قائم کردہ ٹیکنو پارکس میں تعاون پر بھی گفتگو ہوئی جس میں آپریشنل تیاریوں اور کارکردگی کو مزید مستحکم کرنے کے لئے تکنیکی ترقی کو بروئے کار لانے پر اتفاق کیا گیا۔ ملاقات میں باہمی تعلقات کو تقویت دے کر مشترکہ منصوبوں اور تزویراتی شراکت داری کے لئے باہمی تعاون کے دائرہ کار کی تنظیم نو اور اس امر کے لئے نئی راہیں استوار کرنے پر بھی تبادلہ خیال کیا گیا۔
ایئر چیف نے پاکستان اور امریکہ کے مابین پہلے سے موجود خوشگوار تعلقات کا احاطہ کرتے ہوئے دونوں اتحادی ممالک کے درمیان پہلے سے موجود ہم آہنگی اور شراکت داری کو نئی بلندیوں تک لے جانے کے اپنے بھرپور عزم کا اعادہ کیا۔ سربراہ پاک فضائیہ نے مزید کہا کہ پاکستان امریکہ کے ساتھ اپنے مضبوط سفارتی، اقتصادی اور دفاعی تعلقات کو قدر کی نگاہ سے دیکھتا ہے جو علاقائی امن، سلامتی اور استحکام سے متعلق تمام اہم امور میں باہمی اتفاق رائے پر قائم ہیں۔
امریکی سفیر نے پاک فضائیہ کے اہلکاروں کی پیشہ وارانہ مہارت کی تعریف کی اور موجودہ قیادت کے زیر سایہ پاک فضائیہ کی جانب سے خود انحصاری کے میدان میں کی گئی نمایاں پیشرفت کو سراہا۔ امریکی سفیر نے علاقائی امن و استحکام کے لئے پاکستان کے غیر متزلزل عزم کی بھی تعریف کی۔ فریقین نے تربیتی شعبے کی بہتری اور آپریشنل صلاحیتوں کے فروغ پر خصوصی توجہ مرکوز رکھتے ہوئے دونوں ممالک کے مابین موجودہ عسکری تعلقات کو مزید بہتر بنانے پر اتفاق کیا۔
سربراہ پاک فضائیہ اور امریکی سفیر کے مابین یہ ملاقات دیرینہ دوطرفہ تزویراتی تعلقات اور دفاعی شراکت داری کو مزید مستحکم کرنے میں دونوں فریقین کے عزم کا منہ بولتا ثبوت ہے۔
