اسلام آباد،23 جنوری(اے پی پی ):نگران وفاقی وزیرمذہبی امور و بین الامذا ہب ہم آہنگی انیق نے کہا ہے کہ دین کامل اور دائمی اقدار انسانیت کا درس دیتا ہے،انسانی اقدار کا معیار اللہ اور اس کے رسول ﷺ نے طے کر دیا ہے اور نبی اکرم ﷺ اخلاق کو اس کے مکارم تک پہنچانے کیلئے مبعوث ہوئے ہمیں آپ ﷺ کے اخلاق کو اپنی زندگیوں میں نافذ کرنا ہو گا۔
اسلامیہ یونیورسٹی بہاولپور میں “سیرت النبیؐ اور انسانی اقدار اور معاشرے پر ان کے اثرات” کے عنوان سے منعقدہ سیرت النبیؐ کانفرنس سے خطاب کرتے ہوئے وفاقی وزیر کا کہنا تھا کہ دور حاضر میں رائج تمام اعلیٰ اخلاقیات کا آغاز مدینہ طیبہ سے ہوا،سرکار دو عالم ﷺ کی آمد عہد قدیم کا خاتمہ اور عہد جدید کا آغاز ہے۔
بہاولپور یونیورسٹی کے وائس چانسلر ڈاکٹر نوید اختر نے کہا کہ سیرت النبی ﷺ کانفرنس کا انعقاد ہم سب کیلئے باعث سعادت ہے۔ بہاولپور یونیورسٹی معاشرے میں سیرت النبی ﷺ کی ترویج جاری رکھے گی۔
یونیورسٹی کے سابق وائس چانسلر ڈاکٹر سلیم طارق نے کہا کہ ہمیں تباہی کے شکار معاشروں کے اخلاق رذیلہ سے بچنا چاہیے۔ نبی اکرم ﷺ نےعربوں کی اچھی اقدار کو مثبت سمت دی اور بری اقدار کا خاتمہ فرمایا۔ دنیا میں غالب رہنے کیلئے شجاعت، صداقت اور عدالت شرط ہے۔
