اسلام آباد،11جنوری(اے پی پی):نگران وفاقی وزیر اطلاعات، نشریات و پارلیمانی امور مرتضیٰ سولنگی نے کہا ہے کہ ملک کے مستقبل پر سیاست نہیں ہونی چاہیے ، انتخابات انشاءاللہ 8 فروری 2024 کو ہوں گے اور اس میں کسی کو کوئی شک و شبہ نہیں ہونا چاہئے، سیاسی جماعتیں معاشی اصلاحات کی بہتری کے لیے حقیقت پسندانہ جامع پروگرام پیش کریں۔
پریس انفارمیشن ڈیپارٹمنٹ کے زیر اہتمام “الیکشن 2024:سیاسی جماعتوں کا اقتصادی اصلاحات کا ایجنڈا” کے موضوع پر منعقدہ سیمینار سے خطاب کرتے ہوئے انکا کہنا تھا کہ پاکستان کے آئین کے دیباچے میں لکھا ہے کہ یہ ملک اس کے منتخب نمائندے چلائیں گے، غیر منتخب لوگوں کو یہ اختیار نہیں کہ وہ ملک کے مستقبل کا فیصلہ کریں۔ انہوں نے کہا کہ مستقبل کی حکومت اور قومی سیاسی جماعتیں حقیقت پسندانہ معاشی اصلاحات کا ایجنڈا سامنے لائیں اور معاشی اصلاحات کی بہتری کے لیے حقیقت پسندانہ جامع پروگرام پیش کریں اور ایسے وعدے کریں جن پر انہیں یقین ہو کہ وہ یہ کام کر سکیں گے۔
وزیر اطلاعات نے کہا کہ ہم انتخابات سے کچھ دن دور ہیں ، انتخابات کے حوالے سے الیکشن کمیشن اپنے موقف پر قائم ہے، الیکشن کمیشن واحد آئینی ادارہ ہے جس نے انتخابات کا شیڈول دیا ہے اور اس میں کسی قسم کی تبدیلی کسی دوسرے ادارے کے اختیار میں نہیں ہے۔ انہوں نے کہا کہ ہم الیکشن کمیشن کی مالی، انتظامی اور سکیورٹی ضروریات پوری کریں گے۔
وفاقی وزیر اطلاعات نے کہا کہ سیاست معیشت اور معاشی مفادات کا ارتکاز ہے، پاکستان کی معاشی صورتحال میں بہتری کی ضرورت ہے۔ انہوں نے کہا کہ ملک کی جی ڈی پی کا ایک چوتھائی حصہ زراعت سے آتا ہے لیکن اس شعبے سے ٹیکس کی وصولی بہت کم ہے۔ انہوں نے کہا کہ ملک کی آبادی میں تیزی سے اضافہ ہو رہا ہے جس سے صحت اور تعلیم جیسے شعبوں پر دبائو بڑھ رہا ہے۔
مرتضیٰ سولنگی نے کہا کہ سیمینار میں معاشی ماہرین اور صحافیوں نے بھی شرکت کی۔ وفاقی سیکریٹری اطلاعات و نشریات شاہیرہ شاہد اور ایگزیکٹو ڈائریکٹر جنرل پریس انفارمیشن ڈیپارٹمنٹ ڈاکٹر طارق محمود خان بھی اس موقع پر موجود تھے۔
