اسلام آباد،26جنوری (اے پی پی):صدر مملکت ڈاکٹر عارف علوی نے برادر ممالک کے باہمی فائدے کیلئے اقتصادی تعاون کی نئی راہیں تلاش کرنے پر زور دیتے ہوئے کہا ہے کہ پاکستان تاجکستان کے ساتھ تعلقات کو بہت اہمیت دیتا ہے ، تاجکستان پاکستان کا سب سے قریبی وسطی ایشیائی پڑوسی ملک ہے، پاکستان اور تاجکستان کے مابین تجارتی و اقتصادی تعاون کے وسیع امکانات ہیں ۔
ان خیالات کا اظہار انہوں نے تاجکستان کے سفیر سے گفتگو میں کیا، جنہوں نے جمعہ کو یہاں صدر مملکت سے الوداعی ملاقات کی۔ صدر مملکت ڈاکٹر عارف علوی نے کہا کہ اسلاموفوبیا ، سائنس و ٹیکنالوجی پر اسلامی دنیا میں تعاون ناگزیر ہے،دور ِ جدید کے چیلنجز سے نمٹنے کیلئے سائنس و ٹیکنالوجی میں تعاون بڑھانا ہوگا۔
صدر مملکت نے تجارت، توانائی اور دفاع سمیت باہمی دلچسپی کے تمام شعبوں میں دوطرفہ تعلقات پر اظہار ِاطمینان کیا ۔انہوں نے کہا کہ پاکستان غزہ کے عوام کے درد میں دل کی گہرائیوں سے شریک ہے ، غزہ میں اسرائیلی فورسز انسانی حقوق کی سنگین خلاف ورزیاں کر رہی ہیں، غزہ سے دردناک مناظر سامنے آنے کے باوجود عالمی برادری اسرائیلی مظالم روکنے میں ناکام رہی ۔
صدر مملکت نے سبکدوش ہونے والے سفیر کو اسلام آباد میں اپنی مدت ملازمت کی کامیابی سے تکمیل پر مبارکباد دی ۔ صدر مملکت نے پاکستان اور تاجکستان کے درمیان دوستانہ تعلقات کے فروغ کیلئے سفیر کی کوششوں کو سراہا۔
