اسلام آباد،24جنوری (اے پی پی):نگران وزیراعظم انوارالحق کاکڑنے کہا ہے پاکستانی نوجوان ہماری آبادی کا 65 فیصد ہیں، ان کی شمولیت اور تعاون کے بغیر دہشت گردی کے خلاف جنگ میں فتح ممکن نہ تھی ۔
وہ بدھ کو پاکستان نیشنل یوتھ کنونشن 2024 سے مہمان خصوصی کی حیثیت سے خطاب کر رہے تھے ۔ پاک فوج کے سربراہ جنرل سید عاصم منیر اعزازی مہمان تھے ۔ تقریب سے خطاب کر تے ہوئے وزیراعظم انوارالحق کاکڑنے کہا کہ پاکستانی قوم نے دہشت گردی کے ناسور کا جرأت اور بہادری سے مقابلہ کیا اور لازوال قربانیاں دیں ، پاک فوج نے پوری لگن اور پیشہ وارانہ مہارت سے دہشت گردی کے خلاف جنگ لڑی ۔ انہوں نے کہا کہ پاکستان کے ذمہ دار شہری ہونے کے ناطے ہمیں پاکستان کے خلاف پاکستان کے دشمنوں کے پھیلائے ہوئے پروپیگنڈے کو مسترد کرنا چاہئے۔انہوں نے کہا کہ پاکستانی نوجوان قومی سلامتی کے اس ابھرتے ہوئے چیلنج سے نبرد آزما ہونے میں کلیدی کردار ادا کر سکتے ہیں ،اس چیلنج پر اسی وقت قابو پایا جا سکتا ہے جب نوجوان، دشمنوں کے پھیلائے ہوئے پروپیگنڈے کو مسترد کرکے ریاست کی طرف سے فراہم کردہ مستند معلومات پر انحصار کریں۔
اس موقع پر آرمی چیف جنرل سید عاصم منیر نے کہا کہ نوجوان ہمارا قیمتی اثاثہ ہیں اور پاکستان کا روشن مستقبل ہمارے نوجوانوں سے جڑا ہے۔ آرمی چیف نے نوجوانوں کو امید کا پیغام دیتے ہوئے منفی سوچوں کو رد کرنے کی تلقین کی۔ آرمی چیف نے پاکستان کے قیام میں نوجوانوں کے کلیدی کردار کی مثال دیتے ہوئے دور حاضر کے نوجوانوں کو نظم و ضبط، انتھک محنت اور علم کی جستجو سے قوم کی خدمت کرنے کی تاکید کی۔
آرمی چیف نے پاکستان کے توانائی، افرادی قوت، معدنیات، انفارمیشن ٹیکنالوجی اور زراعت کے شعبے میں ترقی کی وسیع استعداد پر روشنی ڈالی۔ آرمی چیف نے پاکستان کو درپیش چیلنجز پر قابو پانے کیلئے ملی یکجہتی اور بھائی چارے کی اہمیت پر زور دیا۔ انہوں نے اس موقع پر دہشت گردی کے خلاف جنگ میں قوم کی عظیم قربانیوں پر روشنی ڈالتے ہوئے نوجوانوں کو پاکستان کے دشمنوں کی قوم کو تقسیم کرنے کی سازشوں سے بچنے کی تلقین کی اور کہا کہ ملک کی ترقی ملی یکجہتی کے بغیر ممکن نہیں۔
آرمی چیف نے اپنی گفتگو کے دوران قرآنِ پاک، علامہ اقبال اور قائد اعظم کے فرمودات کا بار بار حوالہ دیتے ہوئے نوجوانوں کو اپنی بھرپور صلاحیتوں کو بروئے کار لاتے ہوئے ملک و قوم کی خدمت کرنے کی تلقین کی۔ آرمی چیف نے اس موقع پر پوری قوم کے تعاون سے پاک فوج کے پاکستان کی سرحدوں کی ہر قسم کے خطرے اور دشمنوں سے حفاظت کے غیر متزلزل عزم کا اعادہ کیا۔
