اسلام آباد،22جنوری (اے پی پی):نگران وزیراعظم انوار الحق کاکڑ نے ہدایت کی ہے کہ اسلام آباد ماسٹر پلان کے جائزے کے لئے وفاقی کمیشن کی تشکیل جلد از جلد کی جائے ، اسلام آباد کے شہریوں کو پارکنگ کی سہولت فراہم کرنے کے لئے پارکنگ پلازہ تعمیر کئے جائیں، متعلقہ حکام شہر میں ٹریفک کے دباؤ میں کمی کے لئے مؤثر حکمت عملی تشکیل دیں، اسلام آباد ماسٹر پلان پر نظر ثانی وفاقی حکومت کی اولین ترجیحات میں سے ہے۔ پیر کو نگران وزیراعظم انوار الحق کاکڑ کی زیر صدارت وفاقی ترقیاتی ادارے (سی ڈی اے) کے امور پر اہم اجلاس منعقد ہوا۔ اجلاس میں وزیراعظم کو اسلام آباد میں بائیسکل لینز منصوبے اور اسلام آباد ماسٹر پلان کے حوالے سے بریفنگ دی گئی۔ وزیراعظم نے ہدایت کی کہ بائیسکل لینز کا منصوبہ اسلام آباد کے لئے ایک ماحول دوست منصوبہ ہے جس کو ترجیحی بنیادوں پر مکمل کیا جائے۔ وزیراعظم نے کہا کہ اسلام آباد ماسٹر پلان پر نظر ثانی وفاقی حکومت کی اولین ترجیحات میں سے ہے۔ وزیراعظم نے کہا کہ اسلام آباد ماسٹر پلان کے جائزے کے لئے وفاقی کمیشن کی تشکیل جلد از جلد کی جائے۔ وزیراعظم نے کہا کہ اسلام آباد میں نئے رہائشی منصوبوں کے لئے عمودی تعمیرات کو ترجیح دی جائے۔ وزیراعظم نے اجلاس میں متعلقہ حکام کو اسلام آباد میں کاروباری سرگرمیوں کے لئے کثیر المنزلہ عمارات کی تعمیر کے لئے سرمایہ کاروں کو راغب کرنے کے لئے مؤثر حکمت عملی تشکیل دینے کی ہدایت کی۔وزیراعظم نے متعلقہ حکام کو اسلام آباد میں پانی کے مسئلے کے جلد از جلد حل کی ہدایت کی۔ وزیراعظم نے کہا کہ اسلام آباد میں پارکنگ کے مسئلے کے حل کے لئے پارکنگ کے لئے مخصوص عمارتیں تعمیر کی جائیں۔
اجلاس میں وزیراعظم نے متعلقہ حکام کو شہر میں ٹریفک کے دباؤ میں کمی کے لئے مؤثر حکمت عملی تشکیل دینے کی ہدایت کی۔ اجلاس کو بتایا گیا کہ بائیسکل لینز منصوبے میں 374 کلومیٹر لینز اور 150 پارکنگ سٹیشنز کی تعمیر شامل ہے۔اجلاس میں سیکریٹری داخلہ، چیئرمین سی ڈی اے اور دیگر اعلیٰ افسران شریک تھے۔
