لاہور، 4 جنوری (اے پی پی): وزیراعلیٰ پنجاب محسن نقوی کی زیر صدارت ہسپتالوں کی اپ گریڈیشن کے پراجیکٹس سے متعلق اجلاس میں فیصلہ کیا گیا کہ پنجاب بھر کے اپ گریڈ ہونے والے ہسپتالوں کے لئے نئے جدید آلات، بیڈز اور دیگر ضروری فرنیچر خریدا جائے گا۔
وزیر اعلیٰ محسن نقوی نے جدید آلات، بیڈز اور فرنیچر کی خریداری کی منظوری دے دی۔ وزیراعلیٰ پنجاب محسن نقوی نے کہا کہ پنجاب کے اپ گریڈ ہونے والے ہسپتالوں میں جدید وہیل چیئرز مہیا کی جائیں گی جبکہ ویٹنگ ایریا کیلئے نئے بینچ اور ڈاکٹرز روم میں نیا فرنیچر بھی فراہم کیا جائے گا۔
انہوں نے کہا کہ اپ گریڈڈ ہسپتالوں میں ایکسرے ایل ای ڈی اور بے بی کارٹ بھی مہیا کی جائیں گی۔ وزیراعلیٰ پنجاب نے کہا کہ ہسپتالوں میں پیشنٹ بیڈز کیلئے تھری کلر بیڈ شیٹ سسٹم لایا جائے گا اور اس کے علاوہ وارڈز میں میڈیسن اور انسٹرومنٹ سٹوریج کیبنٹ مہیا کی جائیں گی۔
وزیراعلیٰ محسن نقوی نے ہدایت دی کہ اپ گریڈڈ ہسپتالوں کیلئے خریداری کا عمل جلد ازجلد مکمل کیا جائے۔ صوبائی وزیر سپیشلائزڈ ہیلتھ کیئر اینڈ میڈیکل ایجوکیشن ڈاکٹر جاوید اکرم،ایڈیشنل چیف سیکرٹری،چیئرمین پلاننگ اینڈ ڈویلپمنٹ بورڈ،سیکرٹریز خزانہ،صحت،تعمیرات ومواصلات اور متعلقہ حکام نے اجلاس میں شرکت کی۔
