لاہور، 3جنوری(اے پی پی): نگران وزیر اعلیٰ پنجاب محسن نقوی کے فوری اقدامات سے ڈرائیونگ لائسنس بنوانے کا عمل آسان اور برق رفتار ہے۔ پنجاب بھر میں مختصر عرصے میں شہریوں نے ریکارڈ ایک کروڑ 15 لاکھ لائسنس بنوا لئے۔
وزیراعلیٰ پنجاب محسن نقوی نے رات گئے پولیس خدمت مرکز لبرٹی کا دورہ کیا۔ انسپکٹرجنرل پولیس ڈاکٹر عثمان انور اور سی سی پی او بلال صدیق کمیانہ بھی ہمراہ تھے۔ وزیر علیٰ محسن نقوی نے ڈرائیونگ لائسنس کے لئے ٹیسٹ دینے والے شہریوں سے ملاقات کی اور آن لائن ٹیسٹ کا مشاہدہ کیا۔
وزیر اعلیٰ نے آن لائن ٹیسٹ میں فیل ہونے پر شہری کو دوبارہ تیاری کے ساتھ آنے کی ہدایت کی۔ وزیر اعلیٰ محسن نقوی نے شہریوں سے ڈرائیونگ لائسنس بنوانے کے عمل اور وقت کے بارے پوچھا۔ شہریوں نے پولیس خدمت مرکز میں ڈرائیونگ لائسنس کے سسٹم کو سراہا۔ شہریوں نے خدمت مرکز میں موجود عملے کے رویے اور کام کی بھی تعریف کی۔
شہریوں نے وزیر اعلیٰ محسن نقوی سے گفتگو کرتے ہوئے کہا کہ اب لائسنس بنوانے میں تاخیر نہیں ہوتی اور نہ ہی انتظار کرنا پڑتا ہے۔ خدمت مرکز کا عملہ بھی رہنمائی اور بہت تعاون کرتا ہے۔
وزیراعلیٰ محسن نقوی نے ٹوٹی ہوئی ٹائلز کو فوری تبدیل کرنے کا حکم دیتے ہوئے کہا کہ ٹوٹی ٹائلز کی جگہ فوری طور پر نئی ٹائلز لگائی جائیں۔ وزیر اعلی محسن نقوی نے خدمت مرکز میں ڈرائیونگ لائسنس کے اجراکے لئے فراہم کردہ سہولتوں کی تحسین کی اور انسپکٹر جنرل پولیس ڈاکٹر عثمان انور اور ان کی ٹیم کی کارکردگی کو سراہا۔
