اسلام آباد ، 31جنوری (اے پی پی ):نگران وفاقی وزیر شاہد اشرف تارڑ نے کہا کہ پاکستان ریلوے کا ریئل ٹائم آن لائن نگرانی کرنے کے لیے انجنوں کو جدید آلات سے لیس کرنے کا فیصلہ کیا گیا ہے۔آن لائن سسٹم آپریشنل کارکردگی اور ٹارگٹ مینٹی نینس کے ساتھ ایندھن کے بجٹ کا تقریباً 15 فیصد بچائے گا۔ریلوے میں انفارمیشن ٹیکنالوجی پر مبنی آن لائن ایندھن کی نگرانی کا نظام شروع کر دیا گیا۔
نگراں وفاقی وزیر ریلوے، مواصلات اور میری ٹائم افیئرز شاہد اشرف تارڑ نے بروز بدھ ان خیالات کا اظہار پاکستان ریلویز میں انفارمیشن ٹیکنالوجی پر مبنی فیول مانیٹرنگ سسٹم کی افتتاحی تقریب سے خطاب کرتے ہوئے کیا۔
شاہد اشرف تارڑ نے کہا کہ ریلوے کی مالیاتی اور آپریشنل کارکردگی میں اضافہ ہوگا۔ ریلوے کے مالی وسائل کی بچت ہوگی اور ضیاع اور چوری میں کمی آئے گی۔ایک ڈیش بورڈ تیار کیا جائے گا جہاں تمام متعلقہ معلومات ایک کلک پر دستیاب ہوں گی۔ ریئل ٹائم ایندھن کی کھپت اور ایندھن بھرنے، اوسط رفتار، وقت کا ضیاع، ریئل ٹائم لوکیشن اور مینٹیننس کی ضرورت کا بتائے گا۔
وفاقی وزیر نے کہا کہ ڈرائیور کے رویئے اور پرفارمنس کا بھی تجزیہ کیا جا سکے گا۔ ڈیش بورڈ ایندھن کے استعمال کے پیٹرن میں غیر معمولی اضافہ/کمی کے لیے ایک سرخ پاپ اپ دکھائے گا۔ یہ نظام بہتر اور بروقت فیصلہ کرنے کے لیے ڈیٹا کا خودکار تفصیلی تجزیہ تیار کرے گا۔مسافروں کے لیے سفری سہولیات کو مزید محفوظ بنایا جا سکے گا۔
