لاہور 22 جنوری ( اے پی پی ) ڈیڈلائن سے قبل میگا منصوبے کی تکمیل کے لیے دن رات ایک وزیر اعلیٰ پنجاب محسن نقوی نے کنٹرولڈ ایکسس کوریڈور بند روڈ منصوبے کا تفصیلی دورہ کیا۔
بابو صابو سے سگیاں تک پیکج ٹو کا 55 فیصد جبکہ سگیاں سے نیازی چوک تک پیکج ون کا 65 فیصد کام مکمل ،وزیراعلیٰ نے 8 کلو میٹر طویل پراجیکٹ کا کئی مقامات پر معائنہ کیا اور پیشرفت کا جائزہ لیا۔
وزیر اعلیٰ محسن نقوی نے بابو صابو سے سگیاں تک پیکج ٹو اور سگیاں سے نیازی چوک تک پیکج ون پر جاری کاموں کا مشاہدہ کیا۔انہوں نے پیکج ٹو پر کام کی رفتار تیز کرنے کا حکم دیتے ہوئے کہا کہ اضافی لیبر فورس لگا کر کام کو جلد مکمل کیا جائے۔کوریڈور کو ٹریفک کیلئے کھولنے کے لئے تمام وسائل بروئے کار لائے جائیں۔
کمشنر و ڈی جی ایل ڈی اے اور کنٹریکٹرز نے منصوبے پر ہونے والی پیشرفت کے بارے میں بریفنگ دی۔صوبائی وزیر ہاؤسنگ اظفر علی ناصر، سیکرٹری ہاؤسنگ، سیکرٹری تعمیرات و مواصلات، کمشنر لاہورو ڈی جی ایل ڈی اے، ، سی سی پی او لاہور، سی ٹی او لاہور، ڈاکٹر فرقد عالمگیر، چیف انجینئر ایل ڈی اے، ایم ڈی واسا اور متعلقہ حکام بھی اس موقع پر موجود تھے۔
