اسلام آباد،12جنوری (اے پی پی):وفاقی وزیر خزانہ و محصولات ڈاکٹر شمشاد اختر نے کہا ہے کہ پاکستان کی پہلی خصوصی نیشنل کریڈٹ گارنٹی کمپنی لمیٹڈ (این سی جی سی ایل) کا قیام ایک انقلابی اقدام ہے جس کا مقصد چھوٹے اور درمیانے درجے کے کاروبار کے لئے سرمایہ کاری کی راہ ہموار کرنا ہے۔
وزارت خزانہ اور کارانداز پاکستان کے درمیان نیشنل کریڈٹ گارنٹی کمپنی لمیٹڈ کے قیام کے حوالےسے شراکت داری تقریب سےخطاب کرتےہوئے وزیر خزانہ کا کہنا تھا کہ چھوٹے اور درمیانے درجے کے کاروبار کا فروغ حکومت کی اولین ترجیحات میں شامل ہے اور این سی جی سی ایل کے قیام سے چھوٹے اور درمیانے درجے کے کاروبار کے لئے سرمایہ کاری کے مواقع بڑھانے میں مدد ملے گی ۔انہوں نے کہا کہ شراکت داری کے تحت کمپنی فنانس تک رسائی بڑھانے کے لئے خصوصی کریڈٹ گارنٹی کی سہولت فراہم کرے گی ۔
وزیرخزانہ نے کہا کہ پاکستان چھوٹے اور درمیانے درجے کے کاروبار کا نجی کریڈٹ میں 5.2 فیصد حصہ ہے اور این سی جی سی ایل پاکستان کے 15 لاکھ سے زائد ایس ایم ایز اور 3.7 ٹریلین روپے سے زائد مارکیٹ حجم کے لئے مصنوعات تیار کرے گی ، یہ مالیاتی اداروں کے ساتھ مل کر مارکیٹ میں کریڈٹ کی دستیابی یقینی بنائے گی۔
پاکستان میں برطانیہ کی ہائی کمشنر جین میریٹ نے اس موقع پر اپنے خطاب میں کہا کہ مالیاتی شمولیت کے پروگرام کے تحت کمپنی پر 6 ارب روپے کی سرمایہ کاری کی گئی ہے۔ کارانداز کی چیف ایگزیکٹو آفیسر نے اپنے خطاب میں کہا کہ معاشی ترقی اور اقتصادی نمو کے حوالے سے کارانداز اپنا کردار جار ی رکھے گا۔ انہوں نے کہا کہ چھوٹے اور درمیانے درجے کے کاروبار کے فروغ سے ملک میں روزگار کے مواقع بڑھیں گے۔
چیئرمین ایس ای پی، سٹیٹ بینک کے عہدیدار اور دیگر اعلیٰ حکام بھی تقریب میں موجود تھے۔
