اسلام آباد،11 جنوری(اے پی پی): پاکستان سپر لیگ کے میڈیا حقوق میں غیرمعمولی اضافہ، پی ایس ایل کے لیے میڈیا حقوق کی بولی میں اس کی لائیو اسٹریمنگ اور براڈکاسٹ حقوق میں 2024 اور 2025 کے ایڈیشنز کے لیے بالترتیب 113 اور 45 فیصد اضافہ دیکھا گیا۔
اے آر وائی کمیونیکیشنز (پرائیویٹ) لمیٹڈ (اے آر وائی) نے پاکستان میں ایچ بی ایل پاکستان سپر لیگ 2024 اور 2025 کو نشر کرنے کے لیے عوامی ٹینڈر کے عمل کے تحت سب سے زیادہ بولی جمع کرائی جس میں گزشتہ دو برسوں کے مقابلے میں 45 فیصد کا زبردست اضافہ دیکھا گیا ہے۔
پاکستان ریجن کو 2024-2025 کے لیے پی ایس ایل ٹی وی براڈکاسٹ میڈیا کے حقوق دینے کے لیے شفاف اور میرٹ پر مبنی ٹینڈر کا عمل رہا۔انڈیپنڈنٹ میڈیا کارپور یشن، اے آر وائی کمیونیکیشنز پرائیوٹ لمیٹڈ، پاکستان ٹیلی وژن کارپوریشن لمیٹڈ اور ٹاور اسپورٹس کی جانب سے بولیاں موصول ہوئی تھیں۔
پاکستان میں پاکستان سپر لیگ 2024 اور 2025 کو لائیو سٹریم کرنے کے لیے عوامی ٹینڈر کے عمل کے تحت، سب سے زیادہ بولی ولی ٹیکنالوجیز نے جمع کرائی، جس میں گزشتہ دو سالوں کی قدر سے 113 فیصد کا زبردست اضافہ دیکھا گیا ہے۔پی سی بی کو مجموعی طور پر پانچ پارٹیز کی جانب سے بولیاں موصول ہوئیں جن میں کنسورشیم آف اے آر وائی کمیونیکیشنز ( جس میں اے آر وائی، مائکو، دراز اور تماشا شامل ہیں)، ولی ٹیکنالوجیز ٹرانس گروپ ایف زیڈ ای ۔ جیو نیٹ ورک کے انڈیپنڈنٹ میڈیا کارپوریشن پرائیویٹ لمیٹڈ اور ٹین اسپورٹس شامل ہیں۔
پی سی بی کی بڈ کمیٹی نے اے آر وائی اور ولی ٹیکنالوجیز کی جانب سے جمع کرائی گئی سب سے زیادہ بولیوں کی منظوری کے لیے مجاز اتھارٹی کو سفارش کی ہے۔
اس حوالے سے چیئرمین پی سی بی مینجمنٹ کمیٹی ذکا اشرف نے کہا کہ میں اس تاریخی لمحے پر اے آر وائی، ولی ٹیکنالوجیز، پاکستان کرکٹ بورڈ، اس کی انتظامی کمیٹی اور فرنچائزز کو مبارکباد دینا چاہتا ہوں۔انہوں نے کہا کہ ایچ بی ایل پی ایس ایل ایک بہت بڑا برانڈ ہے اور اس کے مداحوں کی بڑی تعداد ہے۔ یہ ایک بے مثال لمحہ ہے کیونکہ ان دونوں حقوق کی قیمتیں بے مثال ہیں۔
