لاہور، 19 جنوری (اے پی پی): پاکستان کرکٹ بورڈ کی مینجمنٹ کمیٹی کا چوتھا اجلاس ذکاءاشرف کی صدارت جمعہ کو نیشنل کرکٹ اکیڈمی پاکستان کرکٹ بورڈ میں منعقد ہوا۔
کمیٹی ممبران کلیم اللہ خان، اشفاق اختر، محمد مصدق اسلام، عظمت پرویز، ظہیر عباس، خواجہ ندیم، مصطفی رمدے، اے ایس سی، ذوالفقار ملک اور خرم کریم سومرونے میٹنگ میں آن لائن میٹنگ شرکت کی۔
اراکین کو پی سی بی کے امور اور مالیاتی امور پر تفصیلی بریفنگ دی گئی۔ چیف فنانس آفیسر نے کرکٹ بورڈ کے اکاونٹس کی تفصیلات، جاری مالی سال کے اخراجات کا تخمینہ و دیگر معلومات سے آگاہ کیا۔
ذکاءاشرف نے مینجمنٹ کمیٹی کے دور میں حاصل کیے گئے سنگ میل کا خلاصہ پیش کیا جو جولائی کے پہلے ہفتے میں تشکیل دیا گیا تھا۔ جن میں آئی سی سی کی جانب سے پی سی بی کے تعاون میں نمایاں اضافہ، بھارتی کرکٹ بورڈ کا 2008 ءکے بعد پہلی مرتبہ پاکستان کا دورہ، پاکستان کی ایمرجنگ ایشیا کپ (پاکستان شاہینز) اور سری لنکا کے خلاف اوے ٹیسٹ سیریز میں فتح، پاکستان کا آئی سی سی ون ڈے رینکنگ میں دوبارہ نمبر ون مقام حاصل کرنا شامل ہے ۔
اس کے علاوہ پاکستان کی 15 سال بعد ایشیا کپ کی میزبانی، پہلی بار 80 تک خواتین کو ڈومیسٹک کنٹریکٹ پیش کیے گئے ہیں۔ پاکستانی خواتین نے پہلی بار جنوبی افریقہ اور نیوزی لینڈ کے خلاف T20I سیریز میں فتح،علاوہ ازیں پاکستان سپر لیگ 9 اور 10 کے لیے میڈیا کے حقوق اور لائیو سٹریمنگ کے حقوق ٹینڈر کیے گئے اور اب تک کی سب سے زیادہ مالیت کی بولیاں حاصل کی گئیں۔
پاکستان کے کرکٹ ماحولیاتی نظام میں سائنس، مصنوعی ذہانت، اور بائیو مکینکس کے انضمام کے لیے Loughborough یونیورسٹی کے ذیلی ادارے DineticQ کے ساتھ سروس لیول کے معاہدے پر دستخط کیے گئے۔ ذکاء اشرف نے مینجمنٹ کمیٹی کے اراکین، پی سی بی انتظامیہ اور عملے کا اس دور میں تعاون پر شکریہ ادا کیا۔ میٹنگ کے اختتام پر ذکاء اشرف نے اعلان کیا کہ انہوں نے بطور چیئرمین اور ممبرمینجمنٹ کمیٹی اپنا استعفیٰ نگران وزیر اعظم انوار الحق کاکڑ کو پیش کرنے کا فیصلہ کیا ہے۔
اپنے اختتامی کلمات میں ذکاءاشرف نے پی سی بی کے معزز سرپرست کا ان پر اعتماد کرنا کا شکریہ ادا کیا اور پاکستان کرکٹ کی بہتری کے لیے نیک تمناؤں اور دعاؤں کا اظہار کیا۔
