لاہور،31جنوری:( اے پی پی ) چیف سیکرٹری پنجاب زاہد اختر زمان کا سینٹرل جیل کا دورہ، جیل میں قیدیوں کو فراہم کی جانیوالی سہولیات کا جائزہ لیا۔ چیف سیکرٹری نے جیل میں قائم ہسپتال، ووکیشنل سینٹر، فوڈ انسپکشن روم کا معائنہ کیا ،فوڈ انسپکشن روم میں قیدیوں کے کھانے کا معیار چیک کیا اور کہا کہ معیاری خوراک، صفائی کے انتظامات قیدیوں کی بنیادی ضروریات ہیں۔ قیدیوں کو ویڈیو کال، انٹرنیٹ اور ای لائبریری کی سہولت کی فراہمی قابل ستائش اقدام ہے صوبہ کی جیلوں میں بہتری لانے کیلئے اصلاحات جاری ہیں۔
چیف سیکرٹری نے جیلوں میں ملاقات کے طریقہ کار میں بہتری لانے کی ہدایت کی اور کہا کہ قیدیوں کو فنی تربیت کی فراہمی پر خصوصی توجہ دی جائے۔ چیف سیکرٹری نے جیل میں قیدیوں کے تیار کئے گئے قالین کے معیار کو سراہا۔
آئی جی جیل خانہ جات فاروق نذیر نے چیف سیکرٹری کو قیدیوں کی فلاح و بہبود کیلئے کئے جانیوالے اقدامات بارے بریفنگ دی۔سیکرٹری داخلہ شکیل احمد اور محکمہ جیل خانہ جات کے افسران بھی اس موقع پر موجود تھے۔
