لاہور، 18 جنوری (اے پی پی): گورنر پنجاب محمد بلیغ الرحمٰن سے سعودی سفیر نواف بن سعید احمد المالکی نے ملاقات کی۔ ملاقات میں دو طرفہ تعلقات اور باہمی تعاون کے فروغ پر تبادلہ خیال کیا گیا۔
گورنر پنجاب نے گفتگو کرتے ہوئے کہا کہ فلسطین غزہ کی پٹی میں رہائشی علاقوں، پناہ گزین کیمپوں، ہسپتالوں، سکولوں پر بمباری اور اس کے نتیجے میں تباہی تکلیف دہ ہے۔ مہذب قوموں کا اسلحہ نہتے شہریوں پر استعمال ہونا ایک المیہ ہے۔ بلیغ الرحمٰن نے کہا کہ پاکستان اور سعودی عرب کے مابین دیرینہ تاریخی برادرانہ تعلقات ہیں۔ پاکستان اور سعودی عرب مشترکہ مذہب اور ثقافت کی وجہ سے لازوال برادرانہ رشتے میں بندھے ہوئے ہیں۔
گورنر پنجاب نے کہا کہ سیاحت کو حوالے سے سعودی حکومت بہت اچھے اقدامات کر رہی ہے۔ سعودی حکومت کا غیر ملکی سیاحوں کے لیے ویزہ پالیسی کو آسان بنانا خوش آئند ہے۔ گورنر پنجاب نے کہا کہ سعودی حکومت کے پاکستان میں سرمایہ کاری کے نئے اقدامات حوصلہ افزا ہیں۔ سعودی سرمایہ کاروں کے لیے پاکستان میں ساز گار مواقع موجود ہیں۔
انہوں نے کہا کہ پاکستان اور سعودی عرب کے درمیان طلبہ کے وفود کے تبادلے زیادہ سے زیادہ ہونے چاہئیں۔ آج کے دور میں تعلیم، نالج اکانومی اور آرٹیفیشل انٹیلی جنس دنیا میں انقلاب برپا کر رہی ہے۔ گورنر پنجاب نے کہا کہ سعودی طلبہ کو پاکستانی یونیورسٹیوں میں تعلیم کے لیے خوش آمدید کہتے ہیں۔ پاکستانی ڈاکٹرز سعودی عرب سمیت پوری دنیا میں پاکستان کا نام روشن کررہے ہیں۔
سعودی سفیر نے کہا کہ پاکستان میرا دوسرا گھر ہے یہاں پر بہت زیادہ عزت اور پیار ملا ہے۔ انہوں نے کہا کہ سعودی عرب پاکستانی طلبہ کو سکالرشپس دے رہا ہے۔ سٹوڈنٹس ایکسچینج پروگرام کو مزید بڑھایا جائے گا۔ ٹیکسٹائل سمیت دیگر پاکستانی مصنوعات کی کوالٹی بہت اچھی ہے۔ ان کی بہتر مارکیٹنگ کرنے کی ضرورت ہے۔
