لاہور،11جنوری ( اے پی پی): چیف سیکرٹری پنجاب زاہد اختر زمان نے کہا ہے کہ یکم جنوری سے صوبہ بھر میں مینول رجسٹری پر پابندی عائد کر دی گئی ہے۔ ای رجسٹریشن کا نظام لوگوں کیلئے ایک بڑی خدمت ثابت ہوگا،شہریوں کو دفاتر کے چکر لگانے سے نجات ملے گی، کرپشن کا خاتمہ ہو گا۔ ای رجسٹری کی سہولت کیلئے تمام اضلاع میں ای رجسٹریشن سینٹرز قائم کئے جائیں گے۔
ان خیالات کا اظہار انہوں نے سول سیکرٹریٹ میں اجلاس کی صدارت کرتے ہوئے کیا۔اجلاس میں ای رجسٹری اور اراضی ریکارڈ کی ڈیجیٹائزیشن کے منصوبے PULSEکا جائزہ لیا گیا۔چیف سیکرٹری نے کہا کہ ای رجسٹریشن سینٹرز میں بورڈ آف ریونیو سے متعلقہ تمام سروسز ایک چھت تلے فراہم کی جائیں گی۔ ابتدائی طور پر تمام ڈویژنل ہیڈ کوارٹرز میں ای رجسٹریشن سینٹرز قائم کئے جا رہے ہیں۔
چیف سیکرٹری نےتمام ڈویلپمنٹ اتھارٹیز کا ریکارڈ ایل ڈی اے کی طرز پر ڈیجیٹائز کرنے کی ہدایت کی اور راولپنڈی،فیصل آباد، ملتان، گوجرانوالہ کی ڈویلپمنٹ اتھارٹیز کو PULSEکیساتھ منسلک کر دیا جائے۔ناروال،لیہ، اوکاڑہ اور پاکپتن کے ڈپٹی کمشنرز کو PULSEمنصوبے پر کام کی رفتار تیز کرنے کا حکم دیا۔انہوں نے کہا کہ صوبہ میں اراضی کی منتقلی کیلئے ای رجسٹریشن کا نظام متعارف کرایا گیا ہے۔لوگوں کی سہولت کو مد نظر رکھتے ہوئے ڈویژنل کمشنرز کو ای رجسٹریشن سینٹرز کیلئے موزوں جگہ کی نشاندہی کی ہدایت کی گئی ہے ۔
ڈی جی پی ایل آر اے سائرہ عمر نے اجلاس کو تفصیلی بریفنگ دی اور بتایا کہ تمام موضع جات کا اراضی ریکارڈ سکین کر لیا گیا ہے، ڈیٹا انٹری کا کام جاری ہے۔
سینئر ممبر بورڈ آف ریونیو، سیکرٹری ہاؤسنگ اور متعلقہ حکام نے اجلاس میں شرکت کی۔تمام ڈویژنل کمشنرز اور ڈپٹی کمشنر ز ویڈیو لنک کے ذریعے شریک ہوئے۔
