اسلام آباد،14فروری (اے پی پی):اقتصادی رابطہ کمیٹی ( ای سی سی ) کا اجلاس آج نگران وفاقی وزیر خزانہ، محصولات اور اقتصادی امور ڈاکٹر شمشاد اختر کی زیرِ صدارت منعقد ہوا جس میں کمیٹی نے مختلف وزارتوں کی تکنیکی گرانٹس کی منظوری دی۔
اجلاس کے دوران کمیٹی نے فیڈرل بورڈ آف ریونیو (ایف بی آر) کی تجویز پرغور کیا جس میں مقامی طور پر تیار کردہ/اسمبلڈ گاڑیوں (PCT87.03) پر 25فیصد سیلز ٹیکس کی بڑھتی ہوئی شرح کے معیار کو معقول بنانا تھا۔ تفصیلی بحث کے بعد تجویز کی منظوری دی گئی۔
فنانس ڈویژن نے فورم سے نیشنل کریڈٹ گارنٹی کمپنی لمیٹڈ(این سی جی سی ایل) کےشیئر سبسکرپشن ایگریمنٹ (ایس ایس اے) کی منظوری مانگی جس پر کمیٹی نے وزارت خزانہ کے ذریعے این سی جی سی ایل، کارانداز اور حکومت پاکستان کے درمیان ایس ایس اے پر دستخط کرنے کی تجویز کی منظوری دی۔
کمیٹی نے قدرتی گیس کی فروخت کی قیمتوں کا تعین مالی سال 2023-24 ( یکم فروری 2024) کے حوالے سے پیٹرولیم ڈویژن کی سمری پر تفصیل سے غور کیا جس کے بعد ای سی سی نے فیصلہ کیا کہ فروخت کی قیمت/ٹیرف پر نظرثانی سوئی کمپنیوں کی آمدنی کی ضروریات کے مطابق ہونی چاہیے اس کے علاوہ کمیٹی نے کھاد پلانٹس کے لیے گیس کی یکساں قیمت کی بھی سفارش کی۔
ای سی سی نے مسابقتی کمیشن آف پاکستان کو ہدایت کی کہ وہ ماضی قریب میں یوریا کی قیمت میں بے جا اضافے کی تحقیقات کرے اور ذمہ داروں کا تعین کرے اس کے علاوہ کمیٹی نے وزارت صنعت کو مارکیٹ میں یوریا کی قیمتوں کے استحکام کو یقینی بنانے کی بھی ہدایت کی۔
اجلاس کے دوران کمیٹی نے دہشت گردوں اور ریاست مخالف عناصر کے خلاف کارروائیوں کے لیے انٹیلی جنس بیورو کی بڑھتی ہوئی ضروریات کو پورا کرنے کے لیے “رواں مالی سال کے دوران 125 ملین روپے کے اضافی فنڈز کی فراہمی” کے لیے انٹیلی جنس بیورو کی سمری کی بھی منظوری دی۔
ای سی سی کی جانب سے “عالمی بینک سے حاصل کردہ 85 ملین امریکی ڈالر کی کریڈٹ لائنز کی پہلی قسط کے 7,621,756,096روپے کے بقایا فنڈز کے لیے تکنیکی ضمنی گرانٹ کی منظوری” کے حوالے سے فنانس ڈویژن کی سمری کی بھی منظوری دی گئی۔
اجلاس میں وزیر برائے نجکاری و بین الصوبائی رابطہ فواد حسن فواد، وزیر داخلہ، تجارت و صنعت ڈاکٹر گوہر اعجاز، وزیر توانائی و پیٹرولیم ڈویژن محمد علی، وزیر منصوبہ بندی، ترقی اور خصوصی اقدامات سمیع سعید، وزیر بحری امور، مواصلات اور ریلوے شاہد اشرف تارڑ، ڈپٹی چیئرمین پلاننگ کمیشن ڈاکٹر محمد جہانزیب خان، وزیر اعظم کے مشیر برائے خزانہ ڈاکٹر وقار مسعود، وفاقی سیکرٹریز اور متعلقہ وزارتوں کے دیگر اعلیٰ سرکاری افسران نے شرکت کی۔
