اسلام آباد،08 فروری (اے پی پی):اسلام آباد سمیت ملک بھر میں عام انتخابات 2024 کیلئے قومی اسمبلی اور صوبائی اسمبلیوں کی نشستوں پر امیدواروں کے انتخاب کیلئے پولنگ کا عمل شروع ہو گیا ہے ، پولنگ صبح 8 بجے شروع ہوئی جو بغیر کسی وقفے کے شام 5بجے تک جاری رہے گی ، پولنگ کے آغاز سے ہی ملک بھر میں پولنگ سٹیشنز پر ووٹرز کی گہما گہمی نظر آ رہی ہے۔
الیکشن کمیشن کے جاری کردہ اعداد و شمار کے مطابق ملک میں عام انتخابات 2024 کیلئے ووٹرز کی مجموعی تعداد 12 کروڑ 85 لاکھ 85 ہزار 760 ہے جن میں 6 کروڑ 92 لاکھ 63 ہزار 704 مرد ووٹرز جبکہ 5 کروڑ 93 لاکھ 22 ہزار 56 خواتین ووٹرزہیں۔ ملک میں مرد ووٹرز کی شرح 53.87 فیصد جبکہ خواتین ووٹرز کی شرح 46.13 فیصد ہے۔
وفاقی دارالحکومت اسلام آباد میں ووٹرز کی تعداد 10 لاکھ 83 ہزار 29 ہے۔ پنجاب میں ووٹرز کی تعداد 7 کروڑ 32 لاکھ 7 ہزار 896 ہے۔ سندھ میں ووٹرز کی تعداد 2 کروڑ 69 لاکھ 94 ہزار 769 ہے۔اسی طرح خیبر پختوانخوا میں ووٹرز کی مجموعی تعداد 2 کروڑ 19 لاکھ 28 ہزار 119 ہے جبکہ بلوچستان میں ووٹرز کی تعداد 53 لاکھ 71 ہزار 947 ہے۔
انتخابات 2024 کیلئے ملک بھر میں 90675 پولنگ سٹیشنز قائم کئے گئے ہیں ، جن میں سے مردوں کیلئے 25320، خواتین کیلئے 23952 جبکہ 41403 مشترکہ ہیں۔ ان پولنگ سٹیشنز میں کل 276398 پولنگ بوتھ قائم کئے گئے ہیں۔
الیکشن کیلئے ایک لاکھ 37 ہزار سے زائد سیکورٹی اہلکار عوام کی حفاظت کیلئے تعینات کیے گئے ہیں،انتخابات میں تین لیول پر سیکورٹی لگائی گئی ہے، پاک فوج کے دستے کیو آر ایف کے طور پر تعینات ہیں۔انتخابات کی سیکورٹی کیلئے جدید ٹیکنالوجی کا استعمال کیا جا رہا ہے، ہر پولنگ اسٹیشن پر 7 سے 8 سیکورٹی اہلکار تعینات ہیں، حساس پولنگ اسٹیشنز پر سی سی ٹی وی کیمروں سے نگرانی کی جا رہی ہے ۔
