لاہور، 28 فروری (اے پی پی): وزیراعلیٰ پنجاب مریم نواز شریف کی زیر صدارت خصوصی اجلاس منعقد ہوا جس میں وزیراعلیٰ پنجاب نے تمام بی ایچ یو اور رورل ہیلتھ سنٹر کی مرحلہ وار ری ویمپنگ کی ہدایت دی اور پنجاب کے سرکاری ہسپتالوں کی ایمرجنسی میں فری میڈیسن کی فراہمی کا پلان طلب کیا۔
اجلاس میں میڈیسن کی ہوم ڈیلیوری یکم مئی سے شروع کرنے کا اصولی فیصلہ کیا گیا۔وزیر اعلیٰ مریم نواز شریف نے پتھالوجی لیب سسٹم میں بہتری کے لئے تجاویز طلب کیں اور پنجاب بھر میں پتھالوجی لیب کا معیار بہتر بنانے کا حکم بھی دیا۔اجلاس میں سرکاری ہسپتالوں کے لئے سنٹرل پتھالوجی لیب بنانے کی تجویز کا بھی جائزہ لیا گیا۔
وزیراعلیٰ پنجاب نے 3 اضلاع میں میڈیکل سٹی بنانے کے لئے سفارشات اور تجاویز بھی طلب کیں۔وزیر اعلیٰ مریم نواز شریف نے پنجاب بھر میں خالی، متروک اور بند پڑے ہسپتالوں کی عمارتوں کی فہرست طلب کی۔مریم نوازشریف نے کہا کہ مفت ادویات عوام کا حق ہے، میڈیسن دینے کا عہد پورے کریں گے۔
مریم نواز شریف نے کہا کہ پسماندہ اور دور دراز شہروں کے لوگوں کا بھی طبی سہولتوں پر پورا حق ہے۔ عوام کو طبی سہولتیں دینا کوئی احسان نہیں، احسان کرنے والا رویہ بدلنا ہوگا۔ مریم نواز شریف نے کہا کہ ہیلتھ کارڈ کو ری ڈیزائین کرکے جلد فنکشنل کر دیا جائے گا۔
وزیراعلیٰ پنجاب کو بریفننگ میں بتایا گیا کہ پنجاب کے بڑے ہسپتالوں کی ری ویمپنگ جون تک مکمل کر لی جائے گی.سابق سینیٹر پرویز رشید،ارکان اسمبلی، مریم اورنگزیب، خواجہ سلیمان رفیق،عظمیٰ بخاری،بلال کیانی،خواجہ عمران نذیر، ثانیہ عاشق نے اجلاس میں شرکت کی۔چیف سیکرٹری، سیکرٹریز، صحت، فنانس،پنجاب ہیلتھ فیسلیٹیز مینجمنٹ کمپنی، پی ڈی ہیپاٹائٹس،ڈی جی ہیلتھ سروسزاور دیگر متعلقہ حکام بھی اجلاس میں موجود تھے۔
