لاہور، 15فروری(اے پی پی): نگران وزیراعلیٰ پنجاب محسن نقوی نے رات گئے مزار بی بی پاکدامن کا دورہ کیا۔انہوں نے نئے راستے کیلئے زیر تعمیر سڑک پر پیش رفت کا جائزہ لیا اور نئی سڑک کی تعمیر کے ساتھ گاڑیوں کی پارکنگ کیلئے مخصوص جگہ کا کام جلد مکمل کرنے کی ہدایت بھی دی۔
وزیراعلیٰ محسن نقوی نے سڑک کی تعمیر کے حوالے سے اے سی شالامار انعم فاطمہ اوران کی ٹیم کی کارکردگی کو بھی سراہا۔ وزیراعلیٰ محسن نقوی نے متعلقہ پولیس اہلکاروں سے مصافحہ کیا اورانہیں شاباش دی۔ وزیراعلیٰ محسن نقوی نے مزار بی بی پاکدامن پر دئیے جلانے کیلئے علیحدہ جگہ مختص کرنے کی ہدایت دی۔
وزیراعلی پنجاب نے کہا کہ ایمپرس روڈ تک 20فٹ چوڑی سڑک کی تعمیر سے زائرین کو مزار تک آسان رسائی حاصل ہو گی۔ وزیراعلیٰ محسن نقوی نے مزار پر حاضری دی اور ملک کی سالمیت، استحکام اورامن کیلئے دعا بھی کی۔ انہوں نے قوم کی خوشحالی اور ترقی کیلئے بھی دعا کی۔
صوبائی وزراء اظفر علی ناصر، منصور قادر، سیکرٹری تعمیرات ومواصلات، کمشنر لاہور، سیکرٹری اوقاف، سی سی پی او،ڈپٹی کمشنر اورمتعلقہ حکام بھی اس موقع پر موجو دتھے۔
