اسلام آباد13،فروری (اے پی پی):اقتصادی رابطہ کمیٹی (ای سی سی)نے رمضان ریلیف پیکیج کی منظوری دیدی ۔نگران وفاقی وزیر خزانہ، محصولات و اقتصادی امور ڈاکٹر شمشاد اختر کی زیرِ صدارت منگل کوکابینہ کی اقتصادی رابطہ کمیٹی (ای سی سی) کا اجلاس منعقد ہوا ۔
اجلاس میں وزیر برائے نجکاری و بین الصوبائی رابطہ فواد حسن فواد، وزیر داخلہ، تجارت و صنعت ڈاکٹر گوہر اعجاز، وزیر توانائی و پٹرولیم ڈویژن محمد علی، وزیر منصوبہ بندی، ترقی و خصوصی اقدامات سمیع سعید، وزیر بحری امور، مواصلات و ریلوے شاہد اشرف تارڑ، ڈپٹی چیئرمین پلاننگ کمیشن ڈاکٹر محمد جہانزیب خان، وزیر اعظم کے مشیر برائے خزانہ ڈاکٹر وقار مسعود، وفاقی سیکرٹریز اور متعلقہ وزارتوں کے دیگر اعلیٰ سرکاری افسران نے شرکت کی۔
کمیٹی میں وزارت تجارت (ٹیرف پالیسی ونگ) کی ایک سمری مختلف شعبوں سے کسٹم ڈیوٹی کے جائزے کے لئے انفرادی ٹیرف ریشنلائزیشن پروپوزل کے حوالے سے زیر بحث آئی۔ فورم نے غور و خوض کے بعد اس تجویز کی منظوری دی اور مشورہ دیا کہ ٹیرف ریشنلائزیشن کو تجارتی پالیسی کے ساتھ ہم آہنگ کیا جائے۔وزارت تجارت کی جانب سے فورم کے سامنے “ایکسپورٹ فیسیلیٹیشن سکیم 2021 کے تحت گندم کی درآمد اور آٹے کی برآمد کی اجازت” کے حوالے سے ایک تجویز پیش کی گئی۔ ای سی سی نے اس تجویز کی منظوری دی اور متعلقہ وزارتوں کو قیمتی اضافی برآمدات کے مواقع بڑھانے کے لئے جامع تجاویز تیار کرنے کی ہدایت کی۔
ای سی سی نے “1263 میگاواٹ پنجاب تھرمل پاور (پرائیویٹ) لمیٹڈ، جھنگ کی کمیشننگ” کے حوالے سے پاور ڈویژن کی سمری کی بھی منظوری دی۔ وزارت تجارت کی ایک اور تجویز “درآمد شدہ یوریا پر سبسڈی کی 50، 50 فیصد کی بنیاد پر وزارت تجارت کے لئے تکنیکی ضمنی گرانٹ کے اشتراک” پر کمیٹی نے غور کیا۔ ای سی سی نے 6 ارب روپے کی منظوری دی۔ فنڈز پچھلے مالی سال کے لئے سبسڈی کے بقایا جات کے لئے ہیں۔ واضح کیا گیا کہ موجودہ سال کے دوران حکومت کی جانب سے اس اکاؤنٹ پر کسی قسم کی سبسڈی کی اجازت نہیں دی گئی ہے۔ ای سی سی نے یہ بھی ہدایت کی کہ یوریا پر سبسڈی کے اپنے متعلقہ بقایا جات کی ادائیگی کے لئے صوبائی حکومتوں سے رابطہ کیا جائے۔
وزارت منصوبہ بندی، ترقی و خصوصی اقدامات نے ای سی سی کو ملک میں مہنگائی کی صورتحال پر بریفنگ دی۔ فورم نے وزارت کو ہدایت کی کہ وہ اس بات کو یقینی بنائے کہ پی بی ایس کے جمع کردہ ڈیٹا پر تفصیلی تجزیہ کیا جائے اور اسے بروقت مناسب اقدامات کرنے کے لیے کمیٹی کے سامنے بھی پیش کیا جائے۔
رمضان المبارک کے دوران عام لوگوں کو ریلیف فراہم کرنے کے لئے اقتصادی رابطہ کمیٹی نے مجوزہ رمضان ریلیف پیکیج 2024 کی منظوری دے دی جس کے تحت بی آئی ایس پی کے ٹارگٹڈ استفادہ کنندگان کو سبسڈی فراہم کی جائے گی۔ 7,492.75 ملین روپے جو 2023-24 کے بجٹ میں فراہم کئے گئے ہیں۔
