راولپنڈی،16فروری(اے پی پی):پاکستان اور ترکیہ کے درمیان 18ویں ’’پاک۔ ترکیہ اعلیٰ سطحی ملٹری ڈائیلاگ گروپ (ایچ ایل ایم ڈی جی) کا چار روزہ اجلاس اختتام پذیر ہو گیا ہے، اجلاس 13 سے 16فروری تک وزارت دفاع راولپنڈی میں جاری رہا۔
گروپ اجلاس میں پاکستانی وفد کی قیادت سیکرٹری دفاع، لیفٹیننٹ جنرل (ریٹائرڈ) حمود الزماں خان جبکہ ترکیہ کے وفد کی سربراہی ترکیہ کے ڈپٹی چیف آف جنرل سٹاف عرفان اوزسرٹ(Ozsert) کررہے تھے۔
گروپ اجلاس کے باضابطہ سیشن کے انعقاد سے قبل ترکیہ چیف آف جنرل سٹاف نے سیکرٹری دفاع ،لیفٹیننٹ جنرل(ریٹائرڈ) حمودالزمان خان سے ملاقات کی۔ دونوں رہنماؤں نے دفاعی تعاون کی رفتار پر اطمینان کا اظہار کیا اور اسے نئی بلندیوں تک لے جانے کا عہد کیا۔
ملاقات میں سلامتی، انسداد دہشت گردی اور موجودہ علاقائی، اور جغرافیائی و سیاسی امور بھی زیر بحث آئے۔
وفود نے گزشتہ سال ترکیہ میں ایچ ایل ایم ڈی جی( HLMDG )اجلاس کے انعقاد کے بعد سے اب تک ہونے والی پیش رفت کا جائزہ لیا۔ تربیتی مشقوں، دوروں کے تبادلے اور دفاعی سازوسامان کی مشترکہ پیداوار سے متعلق دفاعی تعاون سے متعلق امور پر تبادلہ خیال کیا گیا۔
وفد کے رہنماؤں نے دفاع اور سلامتی کے شعبوں میں تعاون بڑھانے کے لیے مل کر کام کرنے کا عزم کیااور اس بات پر اتفاق کیا گیا کہ پاکستان۔ترکیہ( ایچ ایل ایم ڈی جی) میٹنگ کا 19 واں دور 2025 میں باہمی طور پر طے شدہ تاریخوں پرترکیہ میں منعقد ہوگا۔
