اسلام آباد،یکم مارچ(اے پی پی): نگران وفاقی وزیر مذہبی امور انیق احمد نے کہا ہے کہ او آئی سی کے جھنڈے تلے اہم مسلم ممالک کا ایک وفد اسرائیلی وزیر اعظم سے فوری جنگ بندی کیلئے بات کرے۔ سعودی عرب،ترکی، ملائیشیا، انڈونیشیا، ایران، قطر،مصر ، پاکستان جیسے اہم ممالک کو کلیدی کردار ادا کرنا ہو گا۔
یہ بات وزیر مذہبی امور انیق احمد نے فلسطینی سفیر احمد ربیع سے ملاقات کے دوران کہی۔دونوں رہنماؤں کے مابین باہمی دلچسپی کے امور اور فلسطین کی صورتحال پر تبادلہ خیال کیا گیا۔
وزیر مذہبی امور نے کہا کہ پاکستان اور فلسطین کے مابین بھائی چارے پر مبنی تعلقات ہیں، پاکستان اپنے فلسطینی بھائیوں کی اخلاقی و سفارتی حمایت جاری رکھے گا،پاکستان فلسطینی تحریک کی سب سے پہلے حمایت کرنے والا ملک ہےاور ہمیشہ کرتا رہے گا۔انہوں نے کہا کہ مسلم امہ متحد ہو کر مسئلہ فلسطین کے حل تک پہنچ سکتی ہے۔
پاکستان میں تعینات فلسطینی سفیر احمد ربیع نےکہا کہ پاکستان کے لوگوں کی فلسطین سے محبت پاکستان بننے سے پہلی کی ہے۔ اسرائیلی جارحیت کے تناظر میں فلسطین کی حمایت اور یکجہتی پر پاکستان کا شکریہ ادا کرتے ہیں۔انہوں نے کہا کہ اسرائیلی جارحیت میں شہید ہونے والوں میں 70 فیصد بچے اور خواتین ہیں جن کی تعداد21 ہزار سے زائد ہے، غزہ میں20 ہزار سے زائد عمارتوں کو اسرائیلی قابض افواج نے مسمار کردیا ہے۔
