لاہور،7مارچ ( اے پی پی ): صوبائی وزیر صنعت و تجارت چوہدری شافع حسین نے ٹیوٹا سیکرٹریٹ کا دورہ کیا۔سیکرٹری صنعت و تجارت احسان بھٹہ اور ضلعی اداروں کے سربراہان نے صوبائی وزیر کو بریفنگ دی ۔
اس موقع پر گفتگو کرتے ہوئے صوبائی وزیر صنعت و تجارت چوہدری شافع حسین نے کہا کہ انڈسٹری سیکٹر معیشت کا اہم حصہ، مسائل ترجیحی بنیادوں پر حل کریں گے۔صنعتی مراکز کو حقیقی معنوں میں سرمایہ کاری کے حب بنائیں گے۔ پنجاب میں نئی سرمایہ کاری لانے کیلئے ایک ٹیم کے طورپر کام کریں گے۔ انہوں نے کہا کہ سولر پینلز کی مقامی سطح پر تیاری کی حوصلہ افزائی کی جائے گی۔مہنگائی کی روک تھام کیلئے پرائس کنٹرول کمیٹیوں کو پوری طرح متحرک کیا جائے گا۔اشیائے ضروریہ کی دستیابی یقینی بنا کر قیمتوں میں کمی لائی جائے گی۔مڈل مین کا کردار ختم کر کے اشیائے ضروریہ کی قیمتیں نیچے لائیں گے۔انہوں نے کہا کہ رمضان و ماڈل بازاروں کو حقیقی معنوں میں عوام کو ریلیف کی فراہمی کا ذریعہ بنائیں گے۔ انڈسٹریل سیکٹر میں بڑا پوٹیشنل ہے، محنت سے کام کر کے نتائج دینا ہو ں گے۔
صوبائی وزیرصنعت و تجارت چوہدری شافع حسین نے رمضان کنٹرول روم کا بھی دورہ کیا اور رمضان پیکیج اور اشیائے ضروریہ کی قیمتوں کی مانیٹرنگ کے عمل کا جائزہ لیا۔
ایڈیشنل چیف سیکرٹری، سیکرٹری صنعت و تجارت،ڈی جی انڈسٹریز اور متعلقہ افسران بھی موجود تھے۔ ڈی جی انڈسٹریز نے رمضان کنٹرول روم کی ورکنگ کے حوالے سے تفصیلی بریفنگ دی۔
