اسلام آباد،03 مارچ(اے پی پی ):قومی اسمبلی کا اجلاس اسپیکر ایاز صادق کی زیر صدارت شروع ،نومنتخب قومی اسمبلی کے خصوصی اجلاس میں قائد ایوان اور ملک کے نئے وزیراعظم کے انتخاب کے لئے ووٹنگ کا سلسلہ جاری ہے ۔مسلم لیگ (ن ) اور اتحادی جماعتوں کی جانب سے وزارت عظمیٰ کے منصب کیلئے شہباز شریف امیدوار ہیں جبکہ سنی اتحاد کونسل کی جانب سے عمر ایوب خان ان کے مدمقابل ہیں۔اسپیکر قومی اسمبلی نے اسکروٹنی کے بعد دونوں امیدواروں کے کاغذات نامزدگی منظور کر لیے تھے۔
وزیراعظم کے عہدے کیلئے انتخابی عمل شروع ، اسپیکر کے حکم پرپانچ منٹ تک گھنٹیاں بجائی گئیں۔گھنٹیاں بجانے کا مقصد تمام اراکین کو اسمبلی کے اندر جمع کرنا ہوتا ہے، گھنٹیاں بجائے جانے کے بعد ایوان کے دروازے بند کر دیے گئے۔جس کے بعد قائد ایوان کے انتخاب تک قومی اسمبلی ہال سے نہ کوئی باہر جا سکے گا نہ ہی کسی کو اندر آنے کی اجازت ہوگی۔قائد ایوان کے انتخاب کیلئے ایوان کی تقسیم کا طریقہ کار اختیار کیا گیا ہے، اسپیکرقومی اسمبلی نے وزارت عظمیٰ کے نامزد امیدواروں کے نام پڑھ کر سنائے۔اسپیکر قومی اسمبلی نے ایک نامزد امیدوار کیلئے دائیں اور دوسرے کیلئے بائیں طرف کی لابی مختص کی۔قومی اسمبلی کا ہر رکن جس امیدوار کو ووٹ دینا چاہے، اس طرف کی لابی کے دروازے پر اپنے ووٹ کا اندراج کروائے گا اور پھر انتخابی عمل مکمل ہونے تک لابی میں چلا جائے گا۔
