لاہور،26 مارچ ( اے پی پی ): وزیر اعلیٰ پنجاب مریم نواز شریف سے چیئرمین چائنہ سٹیٹ کنسٹریکشن انجینئرنگ کارپوریشن وانگ یاوڈونگ نے ملاقات کی۔ملاقات میں گفتگو کرتے ہوئے وزیر اعلیٰ پنجاب مریم نواز شریف نے کہا کہ پاکستان اور چین نے قریبی اور مضبوط ترین دوستی کو برقرار رکھا ہے ۔ چائنہ سٹیٹ کنسٹریکشن انجینئرنگ کارپوریشن کے پاکستان میں پراجیکٹس سے کارپوریشن کے تعمیراتی معیار اور پیشہ ورانہ مہارت کا پتہ چلتا ہے۔ انہوں نے کہا کہ سرمایہ کاری کے فروغ کے لئے چین کا ون ونڈو آپریشن سسٹم دنیا بھر میں بہترین ماڈل ہے۔ آئی ٹی سیکٹر میں نجی شعبے کے باہمی اشتراک کار کے بے شمار مواقع موجود ہیں۔ زراعت کے شعبے اور سموگ سے نمٹنے کے لئے چین کے تعاون کا خیر مقدم کریں گے۔
مریم نواز نے کہا کہ چین اور پاکستان کے درمیان اقتصادی تعلقات میں بہتری کی ابھی گنجائش ہے۔ پنجاب میں ارفع کریم آئی ٹی ٹاور سمیت دیگر تعمیراتی پراجیکٹس کیلئے چائنہ سٹیٹ کنسٹریکشن انجینئرنگ کارپوریشن کے شکرگزار ہیں۔ انہوں نے کہا کہ سی پیک فیز چائنہ کا پاکستان کیلئے تحفہ ہے۔ سی پیک کے تحت منصوبوں کے بر وقت تکمیل کے لیے پنجاب حکومت بھرپور تعاؤن کرے گی۔سی پیک پراجیکٹس سے روزگار کے مزید مواقع پیدا ہوں گے ایسے سیکٹرز کا تعین کرنا ہوگا جن میں پاکستان کی برآمدات میں اضافہ کیا جا سکے۔
وائس چیئرمین سی ایس سی ای سی عمر فاروق دیال، لی ویمن اور دیگر حکام بھی ملاقات میں شریک تھے ۔
