لاہور،14مارچ (اے پی پی):وزیر اعلی پنجاب مریم نواز شریف کی زیر صدارت سکول ایجوکیشن سے متعلق اجلاس منعقد ہوا۔اجلاس میں سکول ایجوکیشن کونسل کی تشکیل نوکا فیصلہ کیا گیا،وزیر اعلی نے منظوری دیدی۔پنجاب کریکولم ونگ کی ری سٹرکچرنگ کی منظوری بھی دی گئی۔
وزیر اعلی نے سرکاری سکول میں مارننگ اسمبلی بحال کرنے کی ہدایت کی۔ ان کی ہدایت پرطلبہ کی غذائی ضروریات پوری کرنے کیلئے سکولوں میں ڈبہ بند دودھ دیا جائے گا، پائلٹ پراجیکٹ ضلع راجن پور کے سکولوں میں شروع ہوگا،اینگرو فوڈز کے تعاون سے فلیورڈ ملک دیا جائے گا۔ انہو ں نے پنجاب ٹیکسٹ بک اینڈ کریکولم بورڈ کے امور پر تشویش کا اظہار کیا،طلبہ کو نصابی کتابوں کی فراہمی میں تاخیر پر وزیر اعلی نے برہمی کا اظہار کیا۔انہوں نے پنجاب بھر کے سکولوں کو بتدریج سولر انرجی پر منتقل کرنے کیلئے جامع پلان طلب کر لیا،سرکاری سکولوں میں آفٹر نون کلاسز اور ایوننگ کوچنگ سینٹرز شروع کرنے کی تجویز کا جائزہ بھی لیا گیا۔
وزیر اعلی نے سی ای او کی تعیناتی کیلئے میرٹ پر عملدرآمد کی ہدایت کی۔انہوں نے کہا کہ پنجاب کے سرکاری سکولوں میں بہتر اور معیار تعلیم کی بحالی کیلئے ہر ممکن اقدام کریں گے، عالمی معیار کے مطابق تعلیم سرکاری سکول میں پڑھنے والے ہر بچے کا حق ہے۔ اجلاس میں سکول ٹرانسپورٹ پروگرام، الیکٹراک بائیک،بیگ فری سکول اور دیگر امور کا جائزہ بھی لیا گیا۔ سکول ایجوکیشن میں اصلاحات کیلئے تفصیلی بریفنگ دی گئی۔
سینئر صوبائی وزیر مریم اورنگزیب، صوبائی مشیر پرویز رشید، ارکان صوبائی اسمبلی ثانیہ عاشق،ایم پی اے نوشین عدنان،چیف سیکرٹری، سیکرٹری ایجوکیشن، سیکرٹری فنانس،ایم ڈی پنجاب کریکولم اینڈ ٹیکسٹ بک بورڈ، ایم ڈی پنجاب ایجوکیشن فائونڈیشن، سی ای او پنجاب ایجوکیشن انیشیٹو مینجمنٹ اتھارٹی، ایم ڈی پنجاب ایجوکیشن سیکٹرریفارمز پروگرام اور دیگر متعلقہ حکام نے شرکت کی۔
