اسلام آباد،22مارچ (اے پی پی):وفاقی وزیر برائے منصوبہ بندی ،ترقی اصلاحات وخصوصی اقدامات احسن اقبال نے کہا ہے کہ چینی قیادت اور حکومت پاک چین دوستی کو مزید گہرا کرنے کے خواہاں ہیں،پاکستان سی پیک کے اگلے مرحلے میں جانے کا خواہاں ہے۔
ان خیالات کا اظہار انہوں نے جمعہ کو پاکستان میں تعینات چین کے سفیر جیانگ زئی ڈونگ سے ملاقات کے دوران کیا ۔فریقین کے مابین سی پیک فیز 2 کو تیز کرنے پر اتفاق جبکہ پانچ نئی اقتصادی راہداریوں پر ایک ورکنگ گروپ قائم کرنے کا فیصلہ کیا گیا۔
احسن اقبال نے کہا کہ سی پیک کے تحت اقدامات اور منصوبوں کے بر وقت نفاذ اور تکمیل کو یقینی بنانے کے لئے حکومت پاکستان انتھک محنت کرے گی ، پاکستان میں چینی سرمایہ کاری کو آسان بنانے کے لئے اقتصادی زونز کو فعال کرنا شامل ہے،ہمیں ایسے سیکٹرز کا تعین کرنا ہوگا جن میں پاکستان کی برآمدات میں اضافہ کیا جا سکے۔ انہوں نے کہا کہ سی پیک کے دشمن نہیں چاہتے کہ ہم ترقی کریں ، پاکستان آئی ٹی ، زراعت ، نوجوان نسل کے لئے روزگار کے مواقع ، گرین انرجی اور صنعت و تجارت جیسے شعبوں میں خصوصی توجہ مرکوز کر رہا ہے ، پاکستان نے قومی ترقی کے لئے سی پیک کے تحت پانچ اقتصادی راہداریوں پر کام تیز کر دیا ہے ،ان پانچ راہداریوں میں روزگار کی تخلیق ، گرین انرجی، انوویشن اور خصوصی علاقائی ترقی کے منصوبے شامل ہیں ، گوادر بندرگاہ اور اس سے منسلک فری زون کی ترقی سے غیر ملکی سرمایہ کاری کو راغب کرنے میں مدد ملے گی ،مزید خطے میں روزگار کے مواقع پیدا ہوں گے۔
چین کے سفیر نے وفاقی وزیر کو چوتھی بار وزیر منصوبہ بندی بننے پر مبارکباد دی ،آپ ساری دنیا میں مسٹر سی پیک کے نام سے جانے جاتے ہیں۔ انہوں نے کہا کہ آپ کی سربراہی میں مجھے بھی مزید سیکھنے کا موقع ملے گا ،آپ ایک کامیاب سیاستدان ہونے کے ساتھ ساتھ ایک کامیاب ماہر ترقیاتی معاشیات بھی ہیں ، منصوبہ بندی کی وزارت اور چین کی قومی ترقی اور اصلاحاتی کمیشن دونوں نئی اقتصادی راہداریوں پر الگ الگ کنسپٹ نوٹس (تجاویز) تیار کریں گے،جو مستقبل میں ہر شعبے کے لیے ایک واضح روڈ میپ فراہم کریں گے۔
