اسلام آباد،20 مارچ(اے پی پی):چئیرمین پاکستان کرکٹ بورڈ محسن نقوی کی زیر صدارت کرکٹ اسٹیڈیمز کی اپ گریڈیشن پر اجلاس منعقد ہوا۔ اجلاس میں نیسپاک حکام نے نیشنل بینک کرکٹ سٹیڈیم کراچی، قذافی سٹیڈیم لاہور اور راولپنڈی کرکٹ سٹیڈیم کی اپ گریڈیشن کےابتدائی ڈیزائن چئیرمین پی سی بی محسن نقوی کو پیش کیے گئے۔2025 کو پاکستان میں شیڈول چیمپئنز ٹرافی سے قبل 3 بڑے سٹیڈیمز کی اپ گریڈیشن ہو گی۔
چئیرمین پی سی بی محسن نقوی نے پی سی بی حکام کے ساتھ ابتدائی ڈیزائن کا تفصیلی جائزہ لیا، اپ گریڈیشن کا حتمی پلان جلد تیار کرنے اور تینوں سٹیڈیمز میں شائقین کرکٹ کے لئے سہولتوں کی بہتری کیلئے نیسپاک حکام کو ضروری ہدایات دیں۔
محسن نقوی نے کہا کہ نیشنل بینک کرکٹ سٹیڈیم کراچی، قذافی سٹیڈیم لاہور اور راولپنڈی کرکٹ سٹیڈیم میں سہولتوں کی بہتری کے ساتھ میچ ویو کو بہتر بنانے کا پلان بھی تیار کیا جائے۔انہوں نے کہا کہ ہاسپٹلٹز باکس میں اضافہ اور نشتوں کو آرام دہ بنایا جائے۔
چیف آپریٹنگ آفیسر پی سی بی سلمان نصیر، ڈائریکٹر انفراسٹرکچر پی سی بی، جنرل مینجر نیسپاک اور متعلقہ حکام نے اجلاس میں شرکت کی۔
