اسلام آباد ، 06 مارچ (اے پی پی ): چیئرمین پاکستان کرکٹ بورڈ محسن نقوی سےنیوزی لینڈ کے سیکیورٹی وفد نے بدھ کو یہاں ملاقات کی ہے۔ سیکیورٹی وفد میں نیوزی لینڈ پلیئرز ایسوسی ایشن کے چیف ایگزیکٹو آفیسر ہیتھ ملز اور سیکیورٹی کنسلٹنٹ ریگ ڈکاسن شامل تھے۔
ملاقات میں نیوزی لینڈ کرکٹ ٹیم کے دورہ پاکستان کے انتظامات اور سیکیورٹی پلان پر تبادلہ خیال کیا گیا۔چیئرمین پی سی بی محسن نقوی نے کیوی وفد کو فول پروف سیکیورٹی انتظامات کی یقین دہانی کرائی اور کہا کہ نیوزی لینڈ کرکٹ ٹیم کے کھلاڑی پاکستان کے مہمان ہیں اور کیوی ٹیم کے لئے بہترین سیکیورٹی انتظامات کئے جائیں گے۔
نیوزی لینڈ کے سکیورٹی وفد کا کہنا تھا کہ ہم نے راولپنڈی کرکٹ سٹیڈیم کا دورہ کیا ہے اور یہاں سیکیورٹی انتظامات شاندار ہیں۔کیوی وفد کو پاکستان کرکٹ بورڈ کی جانب سے کیے گئے سیکیورٹی اقدامات سے آگاہ کیا جس پر کیوی وفدنے سیکیورٹی پلان پر اطمینان کااظہار کیا۔
پی سی بی کے چیف آپریٹنگ آفیسر سلمان نصیر، ڈائریکٹر سیکیورٹی ڈیپارٹمنٹ کرنل خالد اور ڈائریکٹر انٹرنیشنل پاکستان کرکٹ بورڈ عثمان واہلہ بھی اس موقع پر موجود تھے۔
