اسلام آباد، 17 اپریل(اے پی پی) :اسپیکر قومی اسمبلی سردار ایاز صادق نے بدھ کو یہاں آذربائیجان کے سفیر خضر فرہادوف سےملاقات کی۔ملاقات میں دوطرفہ تعلقات سمیت باہمی دلچسپی کے اہم امور پر تبادلہ خیال کیا گیا۔
آذربائیجان کے سفیر نے آذربائیجان کی اسپیکر کی جانب سے سردار ایاز صادق کو اسپیکر قومی اسمبلی منتخب ہونے پر مبارکباد دی اور انہیں آذربائیجان کے دورے کی دعوت بھی دی۔
قومی اسمبلی کے سپیکر سردار ایاز صادق نے کہا کہ دونوں ممالک ایک دوسرے کے ساتھ مذہب، ثقافت، تاریخ اور بھائی چارے کے لازوال رشتے میں بندھے ہوئے ہیں ،پاکستان کی عوام آذربائیجان کی عوام سے گہری وابستگی رکھتی ہے، پاکستان نے علاقائی اور عالمی فورمز پر ہمیشہ آذربائیجان کا ساتھ دیا ہے۔ اسپیکر قومی اسمبلی نے کہا کہ دونوں ممالک کےدرمیان پارلیمانی سطح پر رابطوں کا فروغ ضروری ہے انہوں نے مسئلہ کشمیر پر پاکستان کے موقف کی حمایت کرنے پر آذربائیجان کا شکریہ ادا کیا۔
اس اہم ملاقات میں دونوں رہنماؤں کا پاکستان، آذربائیجان اور ترکیہ پر مشتمل سہ فریقی پارلیمانی تعاون کو بڑھانے پر تبادلہ خیال بھی کیا گیا۔آذربائیجان کے سفیر خضر فرہاروف نے اسپیکر قومی اسمبلی کے آذربائیجان سے متعلق تاثرات کو سراہا۔
آذربائیجان کے سفیر خضر فرہاروف نے کہا کہ آذربائیجان پاکستان کو قدر کی نگاہ سے دیکھتا ہے ،آذربائیجان کو پاکستان کے ساتھ اپنے دیرینہ اور دوستانہ تعلقات پر فخر ہے۔انہوں نے مسئلہ ناگورنو کارہ باخ پر پاکستان کی حمایت کے لیے اس کا شکریہ ادا کیا۔
