کوئٹہ ،8 اپریل 2024 ( اے پی پی ): بلوچستان شہدا فورم کے زیر اہتمام چیک تقسیم کرنے کی تقریب منعقد ہوئی۔ تقریب میں شہدا فورم کےپیٹرن ان چیف و رکن قومی اسمبلی نوا زادہ جمال رئیسانی نے خصوصی طور پر شرکت کی۔ تقریب میں ترجمان بلوچستان حکومت شاہد رند اور لواحقین کی فیملیز نے شرکت کی۔
اس موقع پر رکن قومی اسمبلی نوابزادہ جمال رئیسانی نے 14 شہداء کی فیملیز میں چیک تقسیم کیے۔ تقریب کے شرکاءسے رکن قومی اسمبلی نوابزدہ جمال رئیسانی نے خطاب کرتے ہوئے کہا ہے کہ ہماری تنظیم شہداء کے لیے دن رات کام کر رہی ہے، ملک کے لیے قربانیاں دینے والوں کو خراج تحسین پیش کرنا چاہیے، شہدا کی یہ قربانیاں ہمارے سروں کے تاج ہیں۔
انہوں نے مزید کہاکہ شہدا کے لواحقین کے لیے مزید اقدامات کرنے کی ضرورت ہے، شہدا کے لواحقین کئی مشکل حالات سے دوچار ہیں۔
انہوں نے کہا کہ شہدا کے لواحقین کی امداد کے لیے ہر فورم پر آواز اٹھائیں گے، لواحقین کو تعلیم اور روزگار کے مواقع فراہم کرنے ہونگے، کوشش کرینگے کہ حکومت بلوچستان اور دیگر تنظیمیں شہدا کے لواحقین کے لیے مزید کام کریں۔ قرض حسنہ سمیت دیگر اقدامات کے لیے ہر ممکن کوشش کی جائے گی۔
