اسلام آباد،24 اپریل (اے پی پی ):صدر مملکت آصف علی زرداری سے پاکستان میں آسٹریلیاکے ہائی کمشنر نیل ہاکنز نے بدھ کو یہاں ملاقات کی ۔ملاقات میں ہائی کمشنر نے صدر کو دونوں ممالک کے مابین تعلقات کے بارے میں آگاہ کرتے ہوئے بتایا کہ پاکستان اور آسٹریلیا تعلیم ، دفاع اور زراعت کے شعبوں میں تعاون کر رہے ہیں۔
صدر مملکت نے آسٹریلوی کمپنیوں کو پاکستانی معیشت کے مختلف شعبوں میں سرمایہ کاری کرنے کی دعوت دیتے ہوئے کہا کہ زراعت، زرعی آلات اور دیگر آلات کی تیاری میں سرمایہ کاری کی ضرورت ہے۔ صدر مملکت نے کان کنی اور معدنیا ت کے شعبے میں دوطرفہ تعاون پر اطمینان کا اظہار کرتے ہوئے کہا کہ پاکستان اور آسٹریلیا کے مابین دیرینہ تعلقات ہیں۔
