اسلام آباد،24اپریل (اے پی پی):صدر مملکت آصف علی زرداری سے انٹرنیشنل اسلامی یونیورسٹی اسلام آباد کے صدر ڈاکٹر هذال بن حمود العتيبي اور ریکٹر ڈاکٹر ثمینہ ملک نے بدھ کو یہاں ملاقات کی۔ ملاقات میں صدر مملکت کو اعلیٰ تعلیم کے شعبے میں یونیورسٹی کی کارکردگی اور خدمات کے بارے میں آگاہ کیا گیا جبکہ اس موقع پر یونیورسٹی کی مجموعی صورتحال اور انتظامی امور پر بھی تبادلہ خیال کیا گیا۔
انٹرنیشنل اسلامی یونیورسٹی اسلام آباد کی ریکٹر ڈاکٹر ثمینہ نے بریفنگ میں بتایا کہ یونیورسٹی نے تحقیق و ترقی ، جدت اور ڈیجیٹلائزیشن کے فروغ کیلئے سٹریٹجک پلان (2022-2026) تیار کیا ہے ، سٹریٹجک پلان سے یونیورسٹی کے مالی اور انتظامی معاملات بہتر بنانے میں مدد ملے گی۔ بریفنگ میں بتایا گیا کہ سعودی عرب یونیورسٹی کی تعمیر و ترقی کیلئے اہم معاونت فراہم کر رہا ہے ، سعودی عرب نے یونیورسٹی میں نئے بلاک کی تعمیر اور جدید تعلیمی سہولیات کی فراہمی میں مدد فراہم کی ہے۔
اس موقع پر صدر مملکت نے ملک میں اعلی ٰ تعلیم کے فروغ میں انٹرنیشنل اسلامی یونیورسٹی کے کردار کو سراہا صدر مملکت نے یونیورسٹی کی بہتری کیلئے اپنے تعاون کی یقین دہانی بھی کرائی۔
