اسلام آباد،19 اپریل(اے پی پی):صدر مملکت آصف علی زرداری سے بینکنگ محتسب پاکستان سراج الدین عزیز نے آج بروز جمعہ ملاقات کی اور صدر ِمملکت کو ادارے کی سالانہ رپورٹ پیش کی ۔
اس موقع پر صدر ِمملکت نے بینکنگ صارفین کو 1.26 ارب روپے کا مالی ریلیف فراہم کرنے پر بینکنگ محتسب کی کارکردگی کو سراہااور کہا کہ سال 2023 ء میں بینکنگ محتسب کا 25ہزار سے زائد شکایات پر کارروائی کرنا خوش آئند ہے۔
صدر مملکت نے ادارے کے قیام سے لیکر اب تک شکایت کنندگان کو 6.4 ارب کا مجموعی ریلیف دینے پر بھی سراہا اور بینک فراڈ متاثرین کو فوری انصاف کی فراہمی کی ضرورت پر زور دیا۔
صدر مملکت کا کہنا تھا کہ بینکنگ محتسب لوگوں کو بلا قیمت انصاف کی فراہمی، گڈ گورننس کے فروغ میں اہم کردار ادا کررہا ہے ۔ بینکوں کی بدانتظامی کے خلاف بینکنگ محتسب کے کردار اور خدمات بارے آگاہی پیدا کرنا ہوگی، بینکنگ محتسب بارے آگاہی سے زیادہ سے زیادہ لوگ خدمات سے مستفید ہوسکیں گے۔
صدر مملکت نے کہا کہ شکایات کے جلد ازالے کیلئے جدید ٹیکنالوجی اپنانے کی ضرورت ہے ۔
ملاقات میں بینکنگ محتسب نے بینک صارفین کی شکایات کے فوری ازالے کیلئے بینکنگ محتسب کے کردار اور کارکردگی پر روشنی ڈالی اور بتایا کہ بینکنگ محتسب نے حال ہی میں آن لائن پورٹل کا صارف دوست نظام متعارف کرایا ہے جس سے شکایت کنندگان کو اپنی شکایات کے اندراج میں آسانی میسر آئے گی۔
