اسلام آباد،اپریل (اے پی پی): صدر مملکت آصف علی زرداری سے سنگاپور میں پاکستان کی نامزد ہائی کمشنر رابعہ شفیق کی ملاقات ہوئی۔
اس موقع پر صدر مملکت نے ہدایت کی کہ نامزد ہائی کمشنر سنگاپور کے کاروباری اداروں کے ساتھ دوطرفہ تجارتی اور کاروباری روابط کے فروغ کیلئے کام کریں، صدر مملکت نے کہا کہ سنگاپور کے کاروباری اداروں کو پاکستان کی سرمایہ کاری دوست پالیسیوں سے فائدہ اٹھانے کی ترغیب دینے کی ضرورت ہے۔
صدر مملکت نے سنگاپور میں پاکستانی خوراک ، زرعی مصنوعات کی برآمد ات کے مواقع تلاش کرنے کی ضرورت پر زور دیتے ہوئے کہا کہ پاکستان پراسیسڈ خوراک اور سی فوڈ میں سنگاپور کیلئے پائیدار رسد کا ذریعہ بن سکتا ہے۔
صدر مملکت نے پاکستانی افرادی قوت سنگاپور بھیجنے ، آئی ٹی اور زراعت میں دوطرفہ تعاون بڑھانے کیلئے کام کرنے کی ضرورت پر بھی زور دیا۔صدر مملکت نے رابعہ شفیق کو بطور پاکستانی ہائی کمشنر تعیناتی پر مبارکباد دی اور نیک خواہشات کا اظہار کیا۔
