لاہور، 13اپریل(اے پی پی): وزیر اعلیٰ پنجاب مریم نواز شریف کی زیر صدارت مری میں خصوصی اجلاس منعقد ہوا جس میں صوبہ بھر میں امن و امان کی صورتحال کا تفصیلی جائزہ لیا گیا۔ انسپکٹر جنرل پولیس نے امن امان کی مجموعی صورت حال پر اجلاس کو بریفنگ دی۔
اجلاس میں آرگنائزڈ اور سائبر کرائم کے خاتمے کےلئے سپیشل یونٹ قائم کرنےاور آئی ٹی ٹریننگ کا اصولی فیصلہ کیا گیا۔ اجلاس میں عوام کے جان و مال کے تحفظ کیلئے اقدامات کے لئے تجاویز اور سفارشات پیش کی گئیں۔ اجلاس نے پولیس میں کرپشن اور غیر پیشہ ورانہ رویے کی نشاندھی کے لئے سپیشل آڈٹ سسٹم نافذ کرنے کی منظوری دی ۔
اجلاس کو بتایا گیا کہ کرپٹ اور مجرموں سے ساز باز کرنے والے پولیس آفیسرز اور اہلکاروں کا سپیشل کورٹ مارشل ہوگا۔ پولیس کی طرف سے رشوت مانگنے پر سی ایم کے سپیشل ڈیش بورڈ پر شکایت درج ہو سکے گی ۔
اجلاس میں سمگلنگ روکنے کے لئے باڈر سیکورٹی فورسز قائم کرنے کی تجویز پر غور کیا گیا اور ہر کرائم کے لئے فنکشنل سپیشلائزڈ پولیس فورس قائم کرنے کا بھی اصولی فیصلہ کیا گیا ۔ اجلاس نے منشیات کے خاتمے کےلئے مہم مسلسل جاری رکھنے کی منظوری دیتے ہوئے عورتوں اور بچوں سے زیادتی کے مقدمات میں سزائے موت کے لئے قانون سازی کا فیصلہ کیا۔ اجلاس نے پنجاب میں ناجائز اسلحہ کلچر کے خاتمے کے لئے اقدامات کی ہدایت دیتے ہوئے قوانین میں ترمیم کا بھی فیصلہ کیا۔
وزیر اعلیٰ پنجاب نے پتنگ بازی اور دھاتی تار کے سدباب کے لئے مزید فول پروف انتظامات کرنے کا حکم دیا۔ مریم نواز نے کہا کہ سزا یقینی بنا کر جرائم میں کمی یقنی بنائی جاسکتی ہے۔ بچوں اور عورتوں سے زیادتی کے مقدمات میں ملوث افراد کو کیفر کردار تک پہنچا یا جائے۔
مریم نواز شریف نے کہا کہ پنجاب کے ہر شہری کا تحفظ حکومت کی بنیادی ذمہ داری ہے، انھوں نے کہا کہ پولیس کو جدید اسلحہ ،الات گاڑیاں نائٹ ویژن اور ڈرون فراہم کرینگے ۔ مریم نواز شریف نے کہا کہ دہشت گردی ، سمگلنگ اور گینگز کے مستقل خاتمے کیلئے موثر کارروائی یقینی بنائی جائے ۔
انہوں نے کہا کہ پراسکیوشن اور انوسٹی گیشن کا سسٹم میں بہتری کی ضرورت ہے۔ سینٹر منسٹر مریم اورنگزیب ، چیف سیکرٹری، ہوم سیکرٹری، آئی جی،اے آئی جی، کمشنر ، سی سی پی او،آر پی او اور دیگر حکام بھی موجود تھے۔
