اسلام آباد،25 اپریل(اے پی پی):محکمہ موسمیات نے آئندہ تین سے چار دنوں کے دوران بلوچستان، بالائی خیبرپختونخوا اور کشمیر میں موسلادھار بارشوں کی پیشنگوئی کی ہے۔بارشوں کے باعث مقامی اور برساتی ندی نالوں میں طغیانی کا خطرہ ہے جبکہ اس دوران تیز بارش کے باعث لینڈسلائیڈنگ، آندھی و ژالہ باری سے انسانی جانوں ، کھڑی فصلوں اور کمزور انفراسٹرکچر کو نقصان پہنچ سکتا ہے۔
گزشتہ چوبیس گھنٹوں کے دوران ملک کے بیشترعلاقوں میں موسم خشک جبکہ جنوبی علاقوں میں گرم رہا۔ تاہم کشمیر، مالم جبہ ، نوکنڈی ، دالبندین اور کوئٹہ میں چند مقامات پر گرج چمک کے ساتھ بارش /بوندا باندی ہوئی۔سب سے زیادہ بارش مالم جبہ میں 02 اور نوکنڈی میں بھی 02ملی میٹر بارش ریکارڈ ہوئی۔
گزشتہ روز ریکارڈ کیے گئے زیادہ سے زیادہ درجہ حرارت کے مطابق خیرپور،موہنجو داڑو میں تینتالیس (43)،جیکب آباد،سکھر،روہڑی،لاڑکانہ اورشہید بینظیر آباد میں بیالیس (42) ڈگری سینٹی گریڈ ریکارڈ کیا گیا۔
