اسلام آباد، 25 اپریل(اے پی پی):اسپیکر قومی اسمبلی سردار ایاز صادق نے کہا ہے کہ کراہ ارض کا تحفظ ہماری اجتماعی ذمہ داری ہے،پاکستان کو شدید موسمیاتی تبدیلیوں کا سامنا ہے،موسمیاتی تبدیلیوں کے مضر اثرات سے بچنے کیلئے زیادہ سے زیادہ درخت لگائے جانے چاہیے۔
ان خیالات کا اظہار اسپیکر قومی اسمبلی سردار ایاز صادق نے موسم بہار کی شجر کاری مہم کی مناسبت سے پارلیمنٹ ہاؤس کے سبزہ زار میں میگنولیا گرینڈی فلورا کا پودہ لگانے کے موقع پر کیا۔
اسپیکر قومی اسمبلی نے کہا کہ شجر کاری مہم میں بڑھ چڑھ کر حصہ لینا ضروری ہے، درخت ہماری زندگی کو فضائی آلودگی سے بچاتے ہیں۔انہوں نے کہا کہ پاکستان کی پارلیمان موسمیاتی تبدیلیوں سے نمٹنے کے لیے کوشاں ہے۔
اس موقع پر اسپیکر قومی اسمبلی نے ملک کی ترقی، خوشحالی اور معاشی و سیاسی استحکام کے لیے دعا بھی کی۔
