اسلام آباد۔17اپریل(اے پی پی): وزیراعظم محمد شہباز شریف سے پاکستان میں ترکمانستان کے سفیر عطاجان مولویوف نے بدھ کے روز وزیر اعظم ہاؤس میں ملاقات کی اور ترکمان قیادت کی جانب سے وزیر اعظم کو دوبارہ منتخب ہونے پر مبارکباد دی۔
وزیراعظم نے ترکمانستان کے صدر سردار بردی محمدوف اور ترکمان عوام کے قومی رہنما گربنگولی بردی محمدوف کا مبارکباد کے پیغامات پر شکریہ ادا کیا۔ وزیراعظم نے دونوں رہنماؤں کے ساتھ اپنی ملاقاتوں کا ذکر کرتے ہوئے امید ظاہر کی کہ مستقبل میں بھی ملاقاتوں کا یہ تسلسل جاری رہے گا۔
وزیراعظم نے پاکستان اور ترکمانستان کے درمیان دیرینہ، تاریخی اور ثقافتی تعلقات کی اہمیت کا ذکر کرتے ہوئے کہا کہ دونوں ممالک کے درمیان دو طرفہ تعاون خصوصاً تجارت، توانائی اور مواصلات کے شعبوں میں تعلقات کو مزید فروغ دینے کی ضرورت ہے۔ ملاقات میں علاقائی تعاون کے حوالے سے اقدامات پر بھی تبادلہء خیال کیا گیا۔
ترکمانستان کے سفیر نے وزیراعظم کو دوطرفہ سرگرمیوں بارے میں آگاہ کیا اور وزیراعظم نےدونوں ممالک کے درمیان اعلیٰ سطح کے تبادلوں کو بڑھانے اور دوطرفہ ادارہ جاتی میکانزم کی اہمیت پر زور دیا۔
ترکمان سفیر جو وفاقی دارلحکومت اسلام آباد میں ڈپلومیٹک کور کے ڈین بھی ہیں، نے اپنے فرائض کی انجام دہی میں وزارت خارجہ اور دیگر سرکاری محکموں کے تعاون اور حمایت پر اظہار تشکر کیا۔
