اسلام آباد 5 اپریل، (اے پی پی)وزیرِ اعظم محمد شہباز شریف کی زیرِ صدارت ملک میں امن و امان کی صورتحال کے حوالے سے اعلی سطحی اجلاس منعقد ہوا۔
وزیرِ اعظم نے وزارت داخلہ کو ملک میں دھشت گردی کے خاتمے اور صوبائی انسداد دھشتگردی ڈیپارٹمنٹس کی مزید بہتری کیلئے صوبوں سے تعاون بڑھانے کی ہدایت کر دی اور ملکی سیکیورٹی بالخصوص مختلف منصوبوں پر کام کرنے والے چینی باشندوں کی سیکیورٹی کے حوالے سے اجلاسوں کا ہر ماہ خود جائزہ لینے کا فیصلہ کیا اور کہا کہ دھشتگردی کی عفریت کے ملک سے خاتمے تک اس کے خلاف جنگ جاری رکھیں گے۔
وزیرِ اعظم نے تمام سیکیورٹی اداروں کو چینی باشندوں کی سیکیورٹی کو فول پروف بنانے کیلئے اقدامات کی ہدایت کی اور سیکیورٹی ایس او پیز کے باقائدگی سے آڈٹ کیلئے ایک جامع لائحہ عمل بنانے کی بھی ہدایت کی۔
وزارت داخلہ نے اجلاس میں وزیرِ اعظم کو ملکی مجموعی امن و سلامتی کی صورتحال اور وزارت کی کارکردگی کے حوالے سے بریفنگ دی۔
اجلاس میں وفاقی وزیر داخلہ سید محسن نقوی، سیکیورٹی اداروں کے سربراہان اور متعلقہ اعلی حکام نے شرکت کی.
