لاہور، 8 اپریل۔( اے پی پی ) صوبائی وزیر پرائمری اینڈ سیکنڈری ہیلتھ کئیر خواجہ عمران نذیر سے محکمہ سپشلائزڈ ہیلتھ کئیر میں بل اینڈ ملنڈا گیٹس فاؤنڈیشن کے وفد نے ملاقات کی۔وفد کی قیادت کنٹری ہیڈ BMGF مائیکل گیلوے نے کی جبکہ وفد میں ڈاکٹر سیدہ راشدہ اور ڈاکٹر ارتضیٰ شامل تھے۔
صوبائی سیکرٹری صحت علی جان خان کی جانب سے لاہور میں پولیو ویکسنیشن کے حوالہ سے تفصیلی بریفنگ میں بتایا گیا کہ لاہور میں گزشتہ سات ماہ میں انسداد پولیو کے اہداف 68 فیصد سے 85 فیصد تک حاصل کرلئے گئے ہیں ۔
صوبائی وزیر صحت خواجہ عمران نذیر نے اس موقع پر اظہار خیال کرتے ہوئے کہا کہ وزیر اعلی پنجاب مریم نواز شریف کی اولین ترجیح ہیلتھ سیکٹر مضبوط بناناہے، پنجاب کو پولیو سے پاک کرنا، وائرس کے پھیلاؤ کو روکنے کے لئے موثر منصوبہ بندی درکار ہوگی، انہوں نے کہا کہ افغان شہریوں کی پولیو امیونائزیشن کے لئے ٹرانزٹ پوانٹس پر کاونٹرز قائم کردیے گئے ہیں، لاہور میں شفیق اباد، خان کالونی میں پولیو کی خصوصی مہم شروع کی جارہی ہے،پنجاب سمیت ملک سے پولیو کے خاتمہ کے لئے بھرپور وسائل فراہم کئے جائیں گے۔
