لاہور،23اپریل (اے پی پی): وزیر اعلی پنجاب مریم نواز نے ایران کے صدر ڈاکٹر ابراہیم رئیسی سے منگل کو یہاں گورنر ہاؤس میں ملاقات کی ۔وزیر اعلی نے ایرانی صدر اور دیگر وفد کو لاہور میں خوش آمدید کہا اور اسلامی انقلاب کی45ویں سالگرہ پر مبارکباد پیش کی۔
وزیر اعلی پنجاب نے کہا کہ پاک ایران دوستی کی تاریخ عشروں پر محیط ہے۔ایران کے ساتھ غربت کے خاتمے کیلئے اقتصادی منصوبوں پر کام کرنے کے خواہاں ہیں۔ مریم نواز نے کہا کہ صنعتی، زرعی ترقی کیلئے دوطرفہ تعاون کو بڑھانے کی ضرورت ہے۔پنجاب کی ویلیو ایڈڈ لائیو سٹاک مارکیٹ میں ایران کی سرمایہ کاری کا خیرمقدم کریں گے۔انہوں نے کہا کہ ایف ایم ڈی زونز کے قیام اور حلال گوشت کی برآمد سے دونوں ممالک کثیر زرمبادلہ حاصل کر سکتے ہیں۔ پنجاب میں ماحول دوست گرین انرجی سیکٹر میں سرمایہ کاری کے بہترین مواقع موجود ہیں۔انہوں نے کہا کہ ایران کے عوام کی خوشحالی اور امن و سکون کیلئے دعاگو ہوں۔
