اسلام آباد ،03 اپریل (اے پی پی) :وزیر تجارت جام کمال سے پاکستان میں ترکمانستان کے سفیر اتاجان مولاموف نے بدھ کو یہاں ملاقات کی جس میں دوطرفہ تجارت کے فروغ کے متعلق حکمت عملیوں پر تفصیلی تبادلہ خیال کیا گیا۔ ترکمانستان کے سفیر نے وفاقی وزیر کو ان کی حالیہ تقرری پر مبارکباد بھی پیش کی۔
اس موقع پر بات کرتے ہوئے وفاقی وزیر جام کمال نے ترکمانستان کے ساتھ دوطرفہ تجارتی تعلقات کو مضبوط بنانے کے لیے پاکستان کے عزم کا اظہار کیا اور باہمی احترام اور برابری کے اصولوں پر مبنی تعاون کو فروغ دینے کی ضرورت کواجاگر کیا گیا۔
ملاقات کے دوران نئے راستوں کی تلاش اور ٹرانزٹ ٹریڈ معاہدوں کے ذریعے تجارتی حجم کو بڑھانے سے متعلق بھی بات ہوئی۔
اس موقع پر ترکمانستان سفیر کی پاکستان میں مقامی پیداوار کے مقابلے سستی بجلی کی پیشکش کے علاوہ ایل پی جی اور بجلی جیسے توانائی کے شعبوں میں تعاون بڑھانے پر بھی بات چیت کی گئی ۔
وزیر تجارت جام کمال نے دونوں ممالک کے درمیان ٹرانزٹ ٹریڈ ایگریمنٹ (ٹی ٹی اے) پر دستخط ہونے کے بارے میں بھی بات کی جس کا مقصد ترکمانستان اور پاکستان کے درمیان تجارت کو فروغ دینا ہے۔ ٹی ٹی اے پر یا تو اسلام آباد یا ترکمانستان کے دارالحکومت اشک آباد میں دستخط ہوں گے۔
ملاقات کے دوران دونوں حکام نے وفود کے تبادلے کی اہمیت پر بھی اتفاق کیا۔
