اقوام متحدہ۔18اپریل (اے پی پی):وفاقی وزیر امور کشمیر ،گلگت بلتستان و سیفران انجینئر امیر مقام اور آزادکشمیر کے وزیراعظم چوہدری انوارالحق کے درمیان ملاقات آج جموں کشمیر ہاؤس میں ہوئی جس میں مقبوضہ کشمیر کی موجودہ صورتحال ،آزادکشمیر میں ترقیاتی منصوبوں سمیت باہمی دلچسپی کے جملہ امور پر تبادلہ خیال کیا گیا ۔
اس موقع پر بات کرتے ہوئے وفاقی وزیر امور کشمیر کا کہنا تھا کہ پاکستان اور کشمیر لازم و ملزوم ہیں کشمیری عوام اپنے جائز حق خودارادیت کیلئے جو جدوجہد کر رہے ہیں وہ انشاءاللہ اس میں کامیاب ہونگے،مقبوضہ کشمیر میں نہتے شہریوں پر بھارتی فوج کے مظالم کی مذمت کرتے ہیں ۔
انجینئر امیر مقام نے کہا کہ وزیراعظم پاکستان محمد شہباز شریف آزادکشمیر کی تعمیر وترقی میں گہری دلچسپی رکھتے ہیں اور وفاقی حکومت آزادکشمیر میں ترقیاتی منصوبوں کے سلسلے میں مکمل تعاون کرے گی۔
اس موقع پر وزیراعظم آزادکشمیر چوہدری انوارالحق نے انجینئر امیر مقام کو وفاقی وزارت امور کشمیر کا منصب سنبھالنے پر مبارکباد دی اور کہا کہ اہل کشمیر کے دل پاکستان کے ساتھ دھڑکتے ہیں اور کشمیری عوام خانہ کعبہ کے بعد پاکستان کی سرزمین کے ساتھ والہانہ محبت کرتے ہیں۔
انہوں نے کہا کہ سبز ہلالی پرچم کی محبت میں کشمیری عوام نے جان ،مال اور اولاد کی قربانیاں دی ہیں اور الحاق پاکستان ہماری منزل ہے اور ہم یہ منزل حاصل کر کے رہیں گے۔
