اسلام آباد ، اپریل 04 (اے پی پی) : پاکستان میں آذربائیجان کے سفیر خضر فرہادوف نےجمعرات کو وفاقی وزیر تجارت جام کمال خان سے ملاقات کی۔
ملاقات میں دونوں ممالک کے درمیان اقتصادی تعاون کو فروغ دینے پر تفصیلی تبادلہ خیال کیا گیا۔اس موقع پر بات کرتے ہوئے وفاقی وزیر جام کمال کا کہنا تھا کہ پاکستان اور آذربائیجان کے مابین مشترکہ تاریخی، سیاسی اور اقتصادی تعلقات ہیں جبکہ ترجیحی تجارتی معاہدے (PTA) طے پانےسے تعلقات میں بہتری کے ساتھ ساتھ تجارت کے مزید دروازے کھلیں گے۔
وفاقی وزیر نے مزید کہا کہ ایک سال میں آذربائیجان کو برآمدات میں 9.70 ملین امریکی ڈالر سے 12.08 ملین امریکی ڈالر تک اضافے ہوا۔ تجارت سے متعلق مسائل کو حل کرکے اس کی حقیقی صلاحیت تک بڑھانے کی ضرورت ہے۔
اس موقع پر وفاقی وزیر نے دونوں ممالک کے درمیان تجارتی اور اقتصادی تعلقات کو مضبوط بنانے کے لیے پاکستان کے عزم کا اعادہ کیا اور تجارتی حجم کو بڑھانے اور کاروبار کے نئے مواقع پیدا کرنے کے لیے عوام سے عوام کے رابطے اور پی ٹی اے پر دستخط کی اہمیت پر زور دیا۔اس موقع پر بات کرتے ہوئے سفیر خضر فرہادوف نے آذربائیجان سے پاکستان کو ایل این جی کی سپلائی دوبارہ شروع کرنے اور باہمی سرمایہ کاری کے امکانات بالخصوص توانائی اور آئی ٹی کے شعبوں میں تعاون بڑھانے کی ضرورت پر زور دیا۔انہوں نے کہا کہ آذربائیجان نے جذبہ خیر سگالی کے تحت کا دسمبر 2027 تک پاکستانی چاول کو درآمدی کسٹم ڈیوٹی سے مستثنیٰ قرار دیا ہوا ہے ۔
