اسلام آباد،25 اپریل (اے پی پی): چئیرمین یوتھ پروگرام رانا مشہود احمد خاں سے شہلا رضا اور میر طارق بگٹی نے جمعرات کو یہاں الگ الگ ملاقات کی جن میں پاکستان ہاکی فیڈریشن کے معاملات پر تفصیلی گفتگو ہوئی۔
اس موقع پر بات کرتے ہوئے رانا مشہود احمد خاں کا کہنا تھا کہ اذلان شاہ ہاکی ٹورنامنٹ میں بھیجے جانے والے کھلاڑیوں کی سلیکشن کے لیے ایک غیر جانبدار کمیٹی تشکیل دی جائیگی جس میں کمیٹی میں ہیڈ کوچ رولینٹ اولٹمینز ، ڈی جی اسپورٹس اور پاکستان اولمپک ایسوسی ایشن کے نمائندہ شامل ہو ں گے، اس مقصد کے لئےایک نیشنل کیمپ السلام آباد میں پاکستان اسپورٹس بورڈ کے زیر انتظام لگایا جائے گا۔
رانا مشہود احمد خاں نے مزید کہا کہ تمام کھلاڑیوں کو میرٹ کی بنیاد پر سیلکٹ کیا جائے گا اور فٹنس ٹیسٹ کے بعد باقاعدہ تربیت کا آغاز کیا جائےگا۔ یہ کھلاڑی دو تاریخ کو اذلان شاہ کپ کے لئے پاکستان سے روانہ ہوں گے۔
چئیرمن یوتھ پروگرام نے بتایا کہ فیڈریشن کے دیگر انتظامی معاملات کا فیصلہ وزیراعظم اگلے چند دن میں کر دیں گے۔
