اسلام آباد، 19 اپریل ( اےپی پی): وفاقی وزیر سمندر پار پاکستانیز اور انسانی وسائل چوہدری سالک حسین سے پاکستان میں اٹلی کی سفیر ماریلینا ارمیلن نے ملاقات کی۔
اس موقع پر وفاقی وزیر چوہدری سالک حسین نے کہاکہ پاکستان اٹلی کو ایک دوست اور قابل اعتماد ساتھی سمجھتا ہے۔ پاکستان اور اٹلی کے متعدد علاقائی اور عالمی مسائل پر یکساں موقف ہے۔ تمام مشترکہ معاملات پر اٹلی کے ساتھ مل کر کام جاری رکھیں گے۔
انہوں نے مزید کہاکہ یورپ کو غیرقانونی تارکین وطن کو روکنے کیلئے بارڈر کو کنڑول اور آپریشن کی ضرورت ہے۔وفاقی وزیر نے اٹلی کو پاکستان میں ہوٹل انڈسٹری میں سرمایہ کاری کی پیشکش بھی کی۔
اٹلی کی سفیر ماریلینا ارمیلن نے پاکستان میں سرمایہ کاری کیلئے موزوں ماحول فراہم کرنے کی ضرورت پر زور دیا اور کہاکہ3 لاکھ پاکستانی اٹلی میں مختلف شعبوں میں خدمات سرانجام دے رہے ہیں۔ وفاقی وزیر نے اٹلی میں پاکستانیوں کیلئے روزگاری کی فراہمی کیلئے ایم او یو کا ڈرافٹ سفیر کے حوالے کیا۔
